Уругларга ажыктыг болгаш айыыл чок дыштанылга

Уругларның чайгы дыштанылгазынга чедир каш-ла хонук арткан. Чайгы дыштанылга үезинде уругларга ажыктыг, өөредилгелиг, сонуурганчыг болгаш солун, кол-ла чүүл — айыыл чок дыштанылганы канчаар организастаарыл деп айтырыглар ада-иелерни дүвүредип эгелээр. Ынчангаш бо дугайында өөредилге болгаш эрге-хоойлу адырының специалистериниң тайылбырын таныштыраал .

Бо чайын уругларга айыыл чок болгаш ажыктыг дыштанылганы организастаары-биле республиканың хоорай, суурларынга чаңчыл езугаар хүндүскү болгаш стационар лагерьлер ажылдап эгелээр.
— Республикага бо чайын ниитизи-биле 159 хүндүскү, 1 майгын база 20 стационар лагерь ажылдаар. Аңаа немей бо чылын Ийи-Талда аграр школаның баазазынга «Эзир оолдарының эп-найыралы» деп смена база ажылдап эгелээр — деп, ТР-ниң өөредилге сайыдының оралакчызы Ольга Сенди чугаалаан.

Чайгы үе уругларга чүгле дыштаныр эвес, акша ажылдап алыр арганы база берип турар деп, ол немээн. ТР-ниң Күш-ажыл болгаш социал политика яамызының шугуму-биле чайгы үеде 500 уругну ажылга хаара тудар.

Ол ышкаш түр үениң дыштанылга төптеринде школачыларны ажыктыг болгаш солун дыштанылга манап турар дээрзин Ольга Сенди дыңнаткан: «Чайгы үеде түр үениң дыштанылга төптери база ажылдаар. Ол дээрге назы четпээн ажы-төлдүң дыштанылгазын шын организастаары-дыр. Республиканың Спорт, Культура болгаш Өөредилге яамыларының албан черлериниң баазазынга школачыларны 16 шакка чедир хаара тудар. Республикада шак-ла ындыг төптерниң саны — 189».

Чайгы дыштанылга эгелээни-биле ажы-төлдүң хостуг үе-шагы көвүдээн. Тыва Республиканың 2019 чылдың июль 13-те үндүргени 1489-3 дугаарлыг «Бичии уругларның кижизидилгезинге болгаш өзүп сайзыраарынга багай салдар чедирбес хемчеглер дугайында» деп доктаал ёзугаар кежээкиниң 22.00 шактан эртенгиниң 6.00 шакка чедир назы четпээн уруг-дарыгның хөй-ниити черинге ада-иези чокка турары хоруглуг.

— Бо айыттынган «комендант шагын» шыңгыы сагыырын сагындырып тур бис. Полиция ажылдакчылары ол талазы-биле үнүүшкүннерни доктаамал чорудуп турар. Ук хоойлуну хажыткан хамаатылар административтиг торгаалга онаажыр. Полицияның дежурный кезээнче кирген назы четпээн уругнуң дугайында медээлер Россияның ИХЯ-ның медээлер баазазынче киргеш, аңаа шыгжаттынар. Ол чүүл уругнуң келир үеде өөредилге албан черинче дужаап киреринге багай салдар болур дээрзин билип алза эки. Ынчангаш ажы-төлүңерни хайгааралга алырыңарны дыңнатты- выс! — деп, назы четпээннер талазы-биле инспектор Виктория Куулар чугаалаан.

“Шын” №39 2024 чылдың май 29