От олуттуг кызыл Аът чылы моорлап кээринге чедир санныг хонуктар арткан. Чаа чыл – ёзулуг тоолзуг байырлал. Ону ылаңгыя бичии чаштарывыс четтикпейн манап турар болгай.
Чаа чылдың бүдүүзүнде "Уругларга өөрүшкүнү сөңнеп тур бис" деп чаңчылчаан акцияны Кызылдың 17 дугаар школазының социал албаны организастаан. Школаның аныяк волонтёрлары ол акцияга идепкейлиг киржип, Чаа чылдың тоол маадырлары болганнар: 10 “а” класстың өөреникчилери Аюш Күжүгет Соок Ирей, а Харжыгаш Александра Монгуш. Олар Чаа чылдың тускай үнүүшкүннүг рейдилеринге киржип, бажыңында өөренип турар инвалид уругларга Чаа чылдың чигирзиг белектерин болгаш ойнаарактарын сөңнеп четкеннер.
Акцияның кол сорулгазы — ачы-буян чедириишкини, ону ылаңгыя дуза хереглээн социал байдалы берге кижилерге онза кичээнгейни угландырып, оларга өөрүшкүнү сөңнээри.
Буянныг чорук – кижиниң өске кым-бир кижиге ажыктыг чүүлдү кылып, дуза көргүзер, энерел сеткилиниң буяны болур. Олар кижилерниң сеткил-хөңнүнге өөрүшкүнү шаңнап, ада-иезиниң чылыг-чымчак эргеледиин албайн чоруур бичии уругларга болгаш өг-бүлелерниң янзы-бүрү чөрүлдээлеринче хөй-ниитиниң кичээнгейин угландырар сорулганы салган.
Акцияга эге класстарның башкылары өөреникчилери-биле идепкейлиг киришкенин демдеглевес аргажок. Идепкейлиг башкылар: 1 “в” класстың башкызы Ольга Викторовна Кымысова, 2 “е” — Ульяна Идам-Сюрюновна Куулар, 4 “ж” — Рада Александровна Ондар, 1 “г” — Валентина Васильевна Соскал, 3 “б” — Галина Геннадьевна Ондар, 2 “а” — Марина Александровна Хомушку, 1 “е” — Анай-Хаак Владимировна Тюлюш, 4 “д” — Жанна Иргитовна Ламажап дээш оон-даа өскелер.
/ Раиса ОНДАР, Тываның улустуң башкызы.
Чуруктарны авторнуң архивинден алган.
“Шын” №50 2025 чылдың декабрь 25