Россияның Иштики херектер яамызының «Барыын-Хемчик» кожууннар аразының эргелелиниң орук шимчээшкининиң айыыл чок чоруунуң күрүне инспекциязының ажылдакчылары назы четпээн чолаачыларның киржилгези-биле айыыл-халапты болдурбас болгаш эвээжедир сорулгалыг өөреникчилер-биле ужуражылганы эрттирген.
Ужуражылга Барыын-Хемчик кожуунда база Ак-Довурак хоорайда назы четпээннерниң киржилгези-биле болган озал-ондактарның дугайында, ол ышкаш уругларның орукка айыыл чок чоруун хандырар талазы-биле хүлээп алдынган болгаш планнаттынган хемчеглер дугайында медээлерден эгелээн.
Орук шимчээшкинин хажытканы дээш, 16 харлыындан тура харыысалгага онаажыр дээрзин уругларга тайылбырлаан.
Машина башкарар эргези чок кижиге руль артынга олурарын чөпшээрээни дээш, РФ-тиң административтиг кем-херек үүлгедиишкиннериниң дугайында кодекстиң 12.7 чүүлүнүң 3-кү кезээнге дүүштүр, автотранспорт ээлерин 30 муң рубльге торгаар. Ындыг улус колдуунда ада-иелер болгаш назы четпээн кижиниң хоойлу ёзугаар төлээлери болуп турары харааданчыг.
Инспекторлар чайгы дыштанылга үезинде бичии чолаачыларның киржилгези-биле озал-ондактарның көвүдээнинче кичээнгейни хаара тудуп, чолаачыларга уругларның автомобиль башкарарын болгаш орук шимчээшкининиң дүрүмнерин хажытпазынче угланган сагындырыг бижиктерни үлээн.
Полиция инспекторлары орук шимчээшкининиң киржикчилеринге орукту кежериниң дүрүмнерин, электри-биле ажылдаар болгаш анаа самокаттарны башкарарының, чадаг-терге мунарының дүрүмнерин база тайылбырлап, айыыл чок болурунуң дериг-херекселдерин болгаш караңгыда чырыыр элементилерни ажыглаарын сагындырган.
ОШАЧКИ ажылдакчылары чадаг кижилерни орук кежерде, бодунуң айыыл чок чоруун бодавышаан, кончуг кичээнгейлиг болурунче кыйгырган.
Чадаг-терге, электри-биле ажылдаар болгаш анаа самокаттар башкарыкчылары база орук шимчээшкининиң киржикчилери болганда, орук шимчээшкининиң дүрүмнерин сагыыры чугула.
«Барыын-Хемчик» кожууннар аразының ОШАЧКИ салбырының медээзи болгаш чуруу.
“Шын” № 30 2025 чылдың август 7