Тываның Баштыңы Владислав Ховалыгның даалгазы-биле уругларның кадыкшылга лагерьлеринде пландан дашкаар хыналдалар чоруп турар. Дыштанылга лагерьлеринде хыналдаларны Чазак Даргазының оралакчылары чогуур органнарның удуртукчулары-биле кады чорудуп турар. Ниитизи-биле хыналдада 21 стационар лагерь бар.
Уругларның турар байдалын хынап, дыштаныкчыларның айыыл чок чоруун хандырып, ооң мурнунда илереттинген сагындырыгларны эткенин хайгаарап көөрү – үнүүшкүннерниң кол сорулгазы.
Кызылда дыңнаары кошкак уругларның школа-интернадының иштинде ажылдап турар «Ушарики» уруглар лагеринге база хыналданы чоруткан. Ажылчын бөлүктү республика Баштыңының Аппарат даргазы база республика Чазааның Аппарат начальниги Юрий Ананьин удуртуп эрттирген. Оон аңгыда комиссияның составында Өөредилге яамызының төлээлери база Назы четпээннер херектериниң талазы-биле ведомстволар аразының комиссиязының ажыл-чорудулгазын деткиир эргелелдиң ажылдакчылары бар.
Хыналда үезинде ажылчын бөлүктүң кежигүннери лагерьниң девискээрин, уругларның чурттап турар байдалын, кижизидилгени болгаш дыштанылганы канчаар чорудуп турарын, инфраструктуразын болгаш аъш-чемниң шынарын хынап көргеннер. Айыыл чок чорукче, арыг-силигниң негелделерин сагып, дыштаныр таарымчалыг байдалдарны тургузуп турарынче онза кичээнгейни угландырган.
Комиссияның төлээлери лагерьниң удуртулгазы, башкылары база уруглар-биле ужуражып чугаалашкаш, чайгы дыштанылга кампаниязын организастаарынга хамаарышкан айтырыгларны болгаш республикага уругларның дыштанылгазын моон соңгаар канчаар хөгжүдериниң дугайында сайгарып көрген. Хыналданың түңнелдеринге даянып, лагерьниң ажыл-чорудулгазын экижидер талазы-биле сүмелерни берген.
Шак мындыг хыналдалар бүгү чайгы дыштанылга кампаниязының дургузунда ай санында болур. Лагерьлерниң 2 дугаар ээлчеглери база эгелей берген.
/ Тыва Чазактың медээзинден алган.
“Шын” №25 2026 чылдың июль 2
"Шын" солуннуң МАХ-каналынга каттыжыңар: max.ru/join/egenQ...