«Сибирь.ПРО» регионнар аразының 21-ги журналистер мөөрейи эгелээн. Сибирь федералдыг округта Президентиниң бүрүн эргелиг төлээзиниң деткимчези-биле 2006 чылдан эгелеп боттанып эгелээн төлевилел Сибирьниң шупту он регионунда эрге-чагырга, бизнес болгаш медиа-ниитилелдиң төлээлерин база катап чыыр.
Күрүне баштыңы 2026 чылды Россияның чоннарының чаңгыс деминиң чылы кылдыр чарлаан. Бо тема националдар аразында эп-найыралды быжыглаарынче болгаш российжи сүлде-сүзүк болгаш мөзү-шынарның үндезин үнелиг чүүлдерин кадагалап арттырарынче угланган төлевилелдерни, удуртуп-башкарылга шиитпирлерин, хамааты эгелээшкиннерни чырыдарынче кичээнгейни угландырган мөөрейниң кол кезээ болур.
Россия Федерациязының Президентизиниң Сибирь федералдыг округта бүрүн эргелиг төлээзи Анатолий Серышев организастыг комитеттиң хуралын ажыдып тура, амгы үеде массалыг информация чепсектериниҢ ажылының стратегтиг чугулазын демдеглээн.
«Кижилер информацияның идепкейлиг хереглекчилери апарганын көрүп турар бис. Бөгүн олар чугааның бүрүн эргелиг киржикчилери апарган. «Бир кижи чугаалаар, шупту дыңнаар» деп чүве ам чок. Удур-дедир харылзаа тыптып келген» — деп, Анатолий Анатольевич демдеглээн. Бүгү делегейде информастыг улуг чижилге үезинде журналист кижиниң ролю эрге-чагырганың ажылының, улус чоннуң болгаш езу-чаңчылдарның дугайында шынныг медээлерни дамчыдары апарганын утпас болза эки. Бөгүн шын дээш демисел – стратегтиг айтырыг, а ында кол киржикчилер массалыг информация чепсектери болур деп бүрүн эргелиг төлээ айыткан.
Мөөрейниң кол темазы – «Улуг Сибирь. Чечектелиишкин дээш каттыжылга». Мөөрейниң киржикчилери Сибирь регионнарының экономиказын, социал адырын, инфраструктуразын хөгжүдеринге, чоннар аразында найыралды болгаш билчилгени быжыглаарынга чаңгыс демниг чорук, ниити үнелиг чүүлдер, бот-боттарынга канчаар дузалажып турарын чырыдар ужурлуг. Бүрүн эргелиг төлээниң даалгазы езугаар мөөрейниң оргкомитедин ооң оралакчызы Вадим Головко удуртур болза, а «Сибирь дугуржулгазы» МА-ның күүсекчи комитеди мөөрейни организастаар болгаш чырыдар.
Мөөрей дүрген сайзырап, эрге-чагырга, бизнес, медиа болгаш ниитилел аразында чугаалажыышкынга Сибирьниң ниити кол шөлчүгежи деп статузун бадыткап турар. Эң-не кол чаа чаартылга – бүрүн эргелиг төлээниң шаңналы — кол шаңналче хамаарылга өскерилген. Ам ол тодаргай номинацияга хамаарышпас, а жюриниң аңгы бадылаашкыны езугаар бүгү округка онза ужур-уткалыг материалдар дээш мөөрейниң шупту тиилекчилериниң аразындан шилиттинген беш лауреатты илередир. Бо чылын 16 номинация, 3 тускай шаңнал, 1 тускай призти аңгылаан.
Оргкомитеттиң кежигүннери регионалдыг шилилдени киирерин деткээн: кол номинациялардан аңгыда, округ федерациязының субъект бүрүзү мөөрейже киирген чагыынга даянгаш, бодунуң девискээринде тергиин журналисти шилиир. Оон аңгыда шаңнал тыпсыр езулалче Сибирьниң шупту регионнарының удуртукчуларын бир дугаар чалаар, олар тиилекчилерге боттары байырны чедирип, шаңналдарны тыпсыр ужурлуг.
Социал медианың хүн бүрүде өзүлдезин барымдаалап, организакчылар блогерлерни деткииринче онза кичээнгейни бо чылын салган. Блогерлерниң ажыл-чорудулгазы хөй-ниитиниң үзел-бодалын хевирлээринге чугула черде апарганын өөренип көргеш, «Сибирь.ПРО-нуң» иштинде бүрүн эргелиг төлээзиниң «БлогПРО» тускай шаңналын доктааткан.
Россия Федерациязының Президентизиниң 2022 чылдың ноябрь 9-та 809 дугаарлыг чарлыы-биле тодараткан российжи сүлде-сүзүк болгаш мөзү-шынар үнелиг чүүлдерин кадагалап арттырарынга болгаш быжыглаарынга тураскааткан ажылдарже онза кичээнгейни салырын оргкомитет чугаа үезинде саналдаан. Амгы үеде медиа ону анаа-ла ынчаар чырыдып турары демдеглеттинген.
2026 чылдың май 18-тен 20-ге чедир Новосибирск хоорайга «Сибирь.ПРО» Медиакубокту эрттирер дугайында инициативаны база хурал үезинде бадылаан. Сибирьниң социал-экономиктиг хөгжүлдезинге хамаарышкан амгы үениң айтырыгларын, федералдыг болгаш регионалдыг мурнакчы эксперттерниң киржилгези-биле өөредилге мастерскаяларын сайгарары, Сибирь федералдыг округтуң шупту регионнарындан журналистерниң, парлалга албаннарының ажылдакчыларының база эксперттерниң арга-дуржулга солчулгазынче болгаш профессионал шынарларын сайзырадырынче угланган профессионал мөөрейлер кирген.
XXI «Сибирь.ПРО» мөөрейге киржир чагыгларны 2026 чылдың апрель 28-тен июль 31-ге чедир хүлээр. Бүрүткеттинген массалыг информация чепсектери (ооң иштинде Сибирь федералдыг округ иштинде ажылдап турар корпунктулар), журналистер болгаш штаттан дашкаар бижикчилер, социал медиада каналдар авторлары (блогерлер), ажык информация курлавырларының башкарыкчылары, күрүне эрге-чагырга болгаш тус чер бот-башкарылга органнарының парлалга албаннары, бизнес ниитилелдер организациялары база бүдүрүлгелерниң корпоративтиг коммуникация талазы-биле албаннары, адыр болгаш ведомство угланыышкынныг үндүрүлгелер редакциялары база Сибирьниң дээди өөредилге черлериниң, ол ышкаш ортумак профессионал өөредилге черлериниң журналистика талазы-биле студентилерин мөөрейге киржир кылдыр чалаан.
2025 чылдың июль 16-дан 2026 чылдың июль 31-ге чедир парлаттынган азы эфирже үнген тускай төлевилелдер болгаш рубрикалар материалдарын мөөрейже киирип болур. Мөөрейниң sibirpro.ru албан езузунуң сайтызында номинациялар, киржир негелделерниң болгаш чагыгларны киирер чурумунуң дугайында тодаргай медээни парлаан.
«Сибирь.ПРО» мөөрейни дараазында черлер деткээн:
Чиңгине партнерлары – «Норильский никель» ДМК» ПАН, «Ростелеком» ПАН-ның Новосибирскиде салбыры, «Россети Сибирь» ПАН, СБЕР-ниң Сибирь банкызы;
Партнерлары – «СУЭК-Кузбасс» АН, «ХК «Сибирский цемент» АН, Барыын-Сибирьниң демир-оруу;
Информастыг партнерлары – «ТАСС» ИА, «Интерфакс» ИА, «Новосибирск» КТРК, «Аргументы и факты – Сибирь», «Комсомольская правда – Новосибирск», «ЧС-ИНФО», Infopro54 информация-аналитика порталы, «МК в Новосибирске», «Сиб.фм», «BFM», «Российская газетаның» Новосибирск салбыры, Status бизнес-журнал, ОТС телеканал, радио54, IRK.ru үндүрүлге четкизи;
Төлевилелдиң тускай партнерлары – «Диалог Регионы» АНО, «Локомотив-Новосибирск» волейбол клуву, Томскунуң күрүне университеди, Россия Банкызының Сибирьде КЭ;
Организатору – Россия Федерациязының субъектилериниң экономиктиг кады ажылдажылгазының «Сибирь дугуржулгазы» регионнар аразының ассоциациязының Күүсекчи комитеди (хуу албан чери).