Тываның В. Көк-оол аттыг национал хөгжүм-шии театрынга Бүгү-делегейниң херээженнер хүнүнге тураскааткан байырлыг хемчег болуп эрткен. Республиканың болгаш чурттуң хөгжүлдезинге хууда үлүг-хуузун киирген херээжен чонга Россия Федерациязының болгаш Тыва Республиканың күрүне шаңналдарын тыпсыр ёзулал болгаш байырлыг концерт Март 8 бүдүүзүнде болуп эрткен.
«Тываның херээжен чону кезээде тускай мөзү-бүдүжү— мерген угааны, тура-соруу, чогаадыкчы хей-аъды-биле ылгалып чораан. Силерниң профессионал чедиишкиннериңер регионнуң хөгжүлдезиниң чугула өзээ. Ооң-биле чергелештир ужур-чаңчылдарның камгалакчылары бооп артпышаан, чылыг-чымчак байдалды тургузуп, өзүп орар салгалды кижизидип чорууруңар эң кол. Бүгү-делегейниң херээженнер хүнү-биле байыр чедирип тур мен! Бо байырлал өөрүшкү, чечектелиишкинни, часкы сеткил-хөөннү эккээр болзун» — деп, республиканың Баштыңы Владислав Ховалыг бодунуң МАХ-каналында хемчегниң киржикчилеринге байырны чедирген.
Чазак Даргазының оралакчызы Эдуард Сандан байырлыг хуралда сөстү алгаш, херээжен чоннуң хөй-ниитижи, профессионал болгаш өг-бүле амыдыралында чугула ролюн демдеглээн.
«Херээженнер бедик профессионал, ажыл-ижинге бердинген чорукту, өг-бүлези болгаш ажы-төлү дээш сагыш човаашкынны берип, сайгарлыкчы арга-мергежилин көргүзүп, хамааты ниитилелдиң тургустунарынга болгаш социал эгелээшкиннерни хөгжүдеринге идепкейлиг киржип, тургузукчу күш-ажылга улуг түңнелдерни чедип ап чоруур. Бо хүнде шериг албанныг херээженнерге, тускай шериг операциязында чок болган дайынчыларның аваларынга, бистиң Ада-чурт камгалакчыларынга дузалажып чоруур херээженнерниң волонтёр отрядтарынга өөрүп четтириишкинниң онзагай сөстерин илередип тур бис» — деп, Чазак Даргазының оралакчызы демдеглээн.
Россияның Эртемнер академиязының Сибирь салбырының Тываның бойдус курлавырларын комплекстиг шиңгээдир институттуң кол эртем ажылдакчызы Светлана Курбатскаяны эртемниң хөгжүлдезинге ачы-хавыяазы болгаш хөй чылдарда үре-түңнелдиг ажыл-чорудулгазы дээш Россияның Президентизиниң чарлыы-биле «Ада-чурт мурнунга ачы-хавыяазы дээш» орденниң II чергениң медалы-биле шаңнаан.
«Тыва Республиканың эртеминиң алдарлыг ажылдакчызы» хүндүлүг атты Тываның күрүне университединиң химия кафедразының доцентизи, химия эртемнериниң кандидады Урана Ондарга тывыскан. «Тыва Республиканың алдарлыг ажылдакчызы» атты «Тываполиграф» КХН-ниң дизайнер-өрүкчүзү Татьяна Монгушка тывыскан. К.Б. Ондар аттыг тыва национал культура болгаш ус-шеверлер хөгжүдер төптүң специализи Виктория Монгуш культура хөгжүлдезинге киирген үлүг-хуузу дээш «Тыва Республиканың культуразының алдарлыг ажылдакчызы» хүндүлүг атты алган. Өвүр кожууннуң көдээ ажыл-агыйының хоочуну Марта Куулар «Тыва Республиканың көдээ ажыл-агыйының алдарлыг ажылдакчызы» хүндүлүг атка төлептиг болган.
В. Көк-оол аттыг национал хөгжүм-шии театрының драма артизи Галина Мунзукту база Улуг-Хем кожуунда күш-ажылдың хоочуну Любовь Ондарны «Шылгараңгай күш-ажылы дээш» Тыва Республиканың медалы-биле шаңнаан.
И.Г. Сафьянов аттыг орус культура төвүнүң директору Вера Лапшаковага культура чаңчылдарын сайзырадырынга болгаш нептередиринге үлүг-хуузун кииргени дээш, Тываның Баштыңының Хүндүлел бижиин тывыскан.
Тываның Баштыңының Өөрүп четтириишкин бижиктерин дараазында ишчилер алган:
— Таңды кожууннуң Балгазын школазының социал башкызы Елена Манеева;
— «Кызыл аэропорту» федералдыг казна бүдүрүлгезиниң кол экономизи Оксана Беспалова;
— иштики албанның майору, Россияның Кеземче херээн күүседир федералдыг албан чериниң Тыва Республика талазы-биле эргелелиниң кеземче-күүселде инспекциязының Барыын-Хемчиктиң муниципалдар аразының салбырының начальнигиниң оралакчызы Саманта Соянова;
— «Кызыл аэропорту» федералдыг казна бүдүрүлгезиниң кол бухгалтериниң оралакчызы Юлия Громова.
Байырлыг хемчег республиканың чогаадыкчы коллективтери киришкен байырлал концерти-биле дооступ, чыылган бүгү херээжен чонга уттундурбас белек болган.
А. МОНГУШ.
Юрий ШИРШИННИҢ тырттырган чуруктары.
“Шын” №9 2026 чылдың март 12