Январь 13-те, Россияның Парлалга хүнүнде, «Кызыл Гранд отельге» байырлыг хурал болуп эрткен. Аңаа ТР-ниң Баштыңы Владислав Ховалыг массалыг информация чепсектеринде шылгараңгай ажылдап чоруур хамаатыларга күрүне шаңналдарын тывыскан.
Амгы үеде Тываның массалыг информация чепсектеринде 58 аттыг – 32 парлалга үндүрүлгелери, солуннар болгаш сеткүүлдер, 20 интернет-үндүрүлгелер, дөрт радиоканал, ийи телеканал бар. Россияның Журналистер эвилелиниң регионалдыг салбырында 171 журналист бактааттынган. Бо чылын республиканың хоочун коллективтери улуг юбилейлерин демдеглээр: «Шын» солун 100 чылын, «Сылдысчыгаш» солун 80 чылын, а Тываның ном үндүрер чери 95 чылын.
Тываның Баштыңы Владислав Ховалыг байырлалдың киржикчилеринге байыр чедирген.
"Байырлалды Парлалга хүнү деп адаза-даа, дүрген өскерлип турар технологияларны барымдаалап, информацияны тарадып турарының хемчээли парлалга тиражындан ажа берген" — деп, ол массалыг информация чепсектериниң төлээлеринге чугаалаан. "Делегей канчаар-даа өскерлип турза, силерниң ажылыңарның үндезини, бир дугаарында, сөсте. А ол сөс кижилерни каттыштырып, оларны ажыктыг ажыл-херектерже сорук киирер күштүг» – деп, ол демдеглээн.
Тываның Баштыңы регионнуң МИЧ төлээлеринге республикада бүгү-ле чугула болуушкуннарны, эрткен чыл ындыг хемчеглер хөй болганын демдеглевишаан, оларны доктаамал чырыдып, деткип чорууру дээш, четтиргенин илереткен.
Владимир Путинниң Ада-чурт камгалакчызының чылы кылдыр чарлаан 2025 чыл – Ада-чурттуң Улуг дайынының үезинде база амгы үеде тыва дайынчыларның маадырлыг чоруктарының дугайында хөйге чугаалаарынга эптиг арга дээрзин Владислав Ховалыг демдеглээн. Эрткен чылын Президентиниң культурлуг бот-идепкейлер фондузунуң деткимчези-биле “Тываның дайынчылары – “Кара өлүмнүң” салгакчылары” деп журналисчи төлевилелди боттандырган. Регионнуң журналистер ниитилели 2025 чылда ону “Тыва оолдарның маадырлыг чоруктары. Мөңге алдар” деп төлевилел-биле уламчылаарын саналдаан. Тываның кол тураскаалының хүндүлүг даңзызынче кандыг-бир чылдагаан-биле кирбейн барган кижилерниң аттарының даңзызын чыыр улуг хемчээлдиг ажылга республикада массалыг информация чепсектери шупту каттыжар.
«Бодунуң амы-тынын бодавайн, оок-боону холунга туткаш, Төрээн чуртун камгалаан болгаш камгалап чоруур шупту кижилерни төөгүже киир бижиири – бистиң хүлээлгевис. Кызылда Тиилелге шөлүнде тураскаалдарга Ада-чурттуң Улуг дайынының киржикчилериниң аттарын мөңгежидер ажылды уламчылаар дээн республиканың журналистериниң эгелээшкинин албан деткиир мен» – деп, Тываның Баштыңы Владислав Ховалыг чугаалаан.
Республиканың медиа-хүрээлеңинге шылгараан төлээлерге профессионал байырлалында күрүне шаңналдарын тывыскан.
«Тувинская правда» солуннуң улуг корреспондентизи Елена Кривдикке «Тыва Республиканың алдарлыг ажылдакчызы» хүндүлүг атты ТР-ниң Баштыңының чарлыы-биле тывыскан.
Тыва Республиканың Баштыңының өөрүп четтириишкин бижиктери-биле:
Информастыг политика департаментизиниң килдис начальниги Орлана Монгушту; «Тывамедиагрупп» четки үндүрүлгезиниң кол редактору Николай Ивановту;
«Тува 24» телеканалдың оператору Чай-Хаан Донгакты;
«Тыва» КТРК-ның кол экономизи Анжелика Чэньни шаңнаан.
Тыва эстраданың сылдыстары – Тываның улустуң артизи Станислав Ириль, Тываның алдарлыг артизи Сайлык Оммун, «Ят-Ха» бөлүктүң солизи Шолбан Монгуш, «Тыва» бөлүктен Артур Дамдын-оол, Тываның күрүне филармониязындан Экер Кара-Сал база Кызылдың уран чүүл колледжизиниң сургуулдары медиа ниитилелдиң төлээлеринге солун концертти бараалгаткан.
А. МОҢГУШ.
Буян ООРЖАКТЫҢ тырттырган чуруктары.
«Шын» №1 2025 чылдың январь 16