Тываның Баштыңы Владислав Ховалыг Моолдуң Чазааның чалааны-биле, Увс аймактың 100 чылдаанынга тураскааткан байырлыг хемчеглерде киржип турар. Регионнуң удуртукчузу ооң дугайында социал четкилерде бодунуң албан ёзунуң арнында дыңнат- кан. Тыва биле Увс аймакты үе дүптүң болгаш найыралдың быжыг доңу тудуштурганын ол демдеглээн.
«Увс аймак биске кажан-даа күш-ажылдың, культурлуг болгаш сүлде-сүзүктүң база өске-даа кайгамчык чаңчылдарны кадагалап арттырганының демдээ болуп келген болгаш болуп артпышаан» — деп, Владислав Ховалыг демдеглээн. Губернатор Сэмжидийн Батжаргал баштаан Увс аймак делегациязы Тывага Ада-чурттуң Улуг дайынынга Тиилелгениң 80 чыл оюн демдеглеп турар байырлалга кээп, өгбелеривистиң маадырлыг чоруунга мөгейгенин сагындырган. Владислав Ховалыг ол чорукту бедии-биле үнелеп, бистиң регионнарывыс төөгүнүң аңгы-аңгы үелеринде кезээде бот-боттарынга чөленгииш болуп деткижип чораанын онзалап демдеглээн.
Регионнуң удуртукчузу Тываның болгаш Россияның хөй националдыг чонунуң өмүнээзинден Увс аймактың чурттакчыларынга чугула болгаш төөгүлүг юбилейи-биле байырны чедирип, чечектелиишкинни болгаш чедиишкиннерни күзээн. Юбилейлиг чылда Улаангом-Ховд уунче амгы үениң каалама автооруун тудуп эгелээни улуг ужур-уткалыг дээрзин демдеглээн. «Моолдуң барыын аймактары, ылаңгыя Увс аймаа, оон-даа шапкын сайзырап хөгжү- зүн» — деп, Тываның Баштыңы чугаалаан.
2002 чылдың мартта садыг-экономиктиг, эртем-техниктиг болгаш культурлуг кады ажылдажылга дугайында чардынган керээ ёзугаар Тыва Республиканың Чазаа Моолдуң Увс аймаа-биле кады ажылдап турар. Бо чылдың майда ол дугуржулгаже Тыва Республика биле Увс аймактың девискээрлерин таварты Россия, Моол база Кыдатты харылзаштырган чаа делегей чергелиг экономика болгаш транспорт коридорун тудар эгелээшкинни хөгжүдер талазы-биле пунктуларны немей киирген.
А. МОНГУШ.
Чуруктарны ТР-ниң Чазааның парлалга албанындан алган.
“Шын” №29 2025 чылдың июль 31