Валентин Юдашкин дег болуксаар салым-чаяанныг кыс

Эрткен өөредилге чылында Тываның политехниктиг техникумунга «Аныяк профессионалдар» федералдыг программаның иштинде «Өөредилге» национал төлевилелиниң деткимчези-биле амгы үениң «Моданың технологиязы», «Паштанчының ажыл-ижи», «Сайгарлыкчы болуру» деп мастерскаялар ажыттынган.

Төлевилел «дүжүдүн» берип эгелээн деп болур. Ук төлевилелдиң киржикчилери, техникумнарның доозукчулары боттарының хууда ажыл-агыйын ажыдып ап эгелээни өөрүнчүг. Шак ындыг сургуулдарның бирээзи Долбанмаа Донгак. Ол Тываның политехниктиг техникумунга быжыкчы мергежилди чедип алган.

Техникумнуң доозукчузу Долбанмаа бо хүннерде чагыгларны хүлээп алгаш, бажыңында национал им-демдектерлиг амгы үениң идик-хевин даарап турар. Ажылдап алган орулгазы-биле «Моданың технологиязы» деп мастерскаяда ышкаш, компьютер-биле башкарар даараныр машинаны, кырлап даараар машинаны, бус-биле хере базар илиирни болгаш идик-хепти делгеп көргүзеринге ажыглаар кижи дүрзүлерин садып алырын аныяк кыс планнап турар.

Келир үеде бодунуң хууда ательезин ажыдар сорулганы Долбанмаа салган. Амдыызында ажылдап алган акшазы удур материалдар садарынга өй болуп турар. Чагыг киирер улустуң саны хүнден хүнче көвүдеп олурары аңаа тура-сорукту берип турар. Долбанмаага эң-не хөй чагыг киирикчилери – ооң уран-шевер талантызының мөгейикчилери, деткикчилери, сорук киирикчилери: дөргүл-төрели, эш-өөрү, чоок кижилери. Олар «алдын холдуг», уран-шевер кижилиг болганынга чоргаарланып чоруурлар. Долбанмааның бодундан бичии дуңмазы угбазының изин истеп, ооң дооскан техникумунга быжыкчы мергежилди өөренип алыр күзелдиг.

Долбанмаа чаа үениң модазының эскизтерин база ажылдап кылып турар. «Быжыкчының мергежилин школачы чорааш-ла шилип алган мен. Көңгүс бичиимде-ле Валентин Юдашкин дег, билдингир модельер болуксаар чораан мен. Мээң эң-не улуг күзе- лим – бодумнуң чогаатканым хептер болгаш кылган ажылдарымның коллекциязының көргүзүглерин организастаары» — деп, аныяк кыс күзелдерин илереткен.

Кызыл хоорайга эң-не аянныг ательелерниң бирээзи Долбанмааның болур, чүге дээрге салган сорулгазынга быжыг туруштуг, кайгамчык салым-чаяанныг сургуул деп, техникумга өөредип чораан башкылары Октябрина Самбуу биле Татьяна Шестопалова санап чоруурлар. Техникумга өөренип турган үелеринде ол чаңгыс эвес удаа салым-чаяанныын, чүткүлдүүн бадыткаан кызымаккай студент.

/ Айдың ОНДАР.