Тываның Баштыңы Владислав Ховалыг Федерация Чөвүлелиниң даргазы Валентина Матвиенкога ужурашкан. 2025 чылда болгаш 2027 чылга чедир планныг үеде федералдыг бюджеттиң төлевилелиниң талазы-биле парламент дыңнаашкыннарының соонда дораан ол ужуражыышкын болган.
Тываның социал-экономиктиг чугула айтырыгларын ужуражыышкынның киржикчилери сайгарып чугаалашкан. Эң ылаңгыя инфраструктурлуг төлевилелдерге федералдыг бюджеттен акшаландырыышкынны тускайлап үндүреринге деткимчези дээш Валентина Матвиенкога өөрүп четтиргенин республиканың удуртукчузу илереткен.
Эрткен 2023 чылда федералдыг бюджеттиң төлевилелиниң талазы-биле парламент дыңнаашкыннарының үезинде Федерация Чөвүлелиниң даргазы Тывада уругларның төрүттүнериниң хөйүн демдеглеп, республикага чаа школаларны тударынга акшаландырыышкынны көвүдедирин Россияның саң-хөө сайыды Антон Силуановка сүмелээн. Ооң сүмези Тывага улуг деткимче болганын Владислав Ховалыг демдеглеп, 2024 чылдың эрткен айларында республикада дөрт чаа школалар ажыглалга киргенин, оларның бирээзин Билиглер хүнүнде ажыглалга кииреринге Россияның Президентизи киришкенин чугаалап, амгы үеде чеди өөредилге черин тудуп турарын дыңнаткан.
Аразында Тыва база кирген 10 регионга Социал-экономиктиг хөгжүлдениң хууда программазын уламчылаар дугайында айтырыгны сайгарып чугаалажып турда, ону сенаторлар деткээн соонда, Президент быжыглап бадылаан. Бо программа Тыва Республикага тудугну улам хөгжүдеринге база дузалыг болур.
Тыва Арат Республика ССРЭ-ге каттышканының 80 чылын демдеглеп турар төөгүлүг үеде Президент Владимир Путинниң тодаратканы национал сорулгаларны күүседип, республиканың хөгжүлдезинге федералдыг төптүң дузазының чугулазын ужуражыышкынның киржикчилери демдеглээннер.
ТР-ниң Чазааның парлалга албаны.
“Шын” №77 от 2024 чылдың октябрь 9