Февраль 4-түң хүнүнде тускай шериг хөделиишкининче Тывадан долу эвес мөөңнээшкин-биле кыйгырткан чаңгыс чер чурттугларывыстан республиканың Чазак Даргазы Владислав Ховалыгга видеодыңнадыг келген.
Ук дыңнадыгга хамаарышкан айтырыгга ол-ла дораан шыңгыы кичээнгейни салып, делгереңгей бижикти Россияның Камгалал яамызынче дарый чоруткан. Ол ышкаш Владислав Ховалыг ук айтырыгны тодарадып шиитпирлээри-биле Донецк Улус Республиказының удуртукчузу Виталий Хоценко-биле телефон дамчыштыр харылзашкаш, видеодыңнадыгда айыттынган улусчу милицияның хөделиишкиннериниң хоойлуга дүгжүп турарын хынаарын дилээн. Оон аңгыда, ДУР-же Тываның Чазак төлээлерин тургустунуп келген айтырыгны шиитпирлээри-биле аъткарган.
Долу эвес мөөңнээшкин ёзугаар бүгү чурттан оолдар, адалар, өгнүң эр ээлери тускай шериг мөөңнээшкининиң даалгаларын күүседири-биле чоруткан. Шак бо чүүл мөөңнээшкин-биле кыйгырткан оолдарның байдалын каржызы-биле хажыдып турар деп, регионнуң удуртукчузу дамчыткан.
ТУСКАЙ ДААЛГАЛАР
Республика Даргазы Шериг албанныгларга болгаш оларның өг-бүлелеринге ачы-дуза чедирер Чаңгыс аай штабты удуртуп-баштап турар иштики политика талазы-биле оралакчы А.А. Чюдюкка, Тускай шериг хөделиишкинниң тускай төлээлекчизи Т.Б. Кууларга шериг комиссариады-биле кады кыйгырткан мөөңнеттиргеннерниң санын болгаш ат-сывын, оларның быжыглаттынган шериг кезээн дарый тодарадырын дааскан. Ук айтырыгның чурумчударын чедип алыры-биле, ажылды чорудар дээрзин Владислав Ховалы дааскан. Оон ыңай балыгланган шериг албанныгларның санын, оларга эмчи дузазын кайда чедирип турарын тодарадыры-биле ажылды чорудуп турар.
ОПЕРАТИВТИГ ШТАБ
Тыва Республиканың удуртукчузу РФ-тиң камгалал сайыдының оралакчызы генерал-полковник Виктор Петрович Горемыкин-биле доктаамал харылзажып турар. Виктор Петрович амгы үеде тускай шериг хөделиишкининиң шуут чоогунда чоруп турар. Тываның шериг албанныгларындан база оларның чоок кижилеринден кээп турар чидиг айтырыгларның дугайында Владислав Ховалыг аңаа дыңнаткан.
Генерал-полковник ону сайгарып, шиитпирлээрин аазаан. Оон аңгыда, ДУР-нуң Чазааның Даргазы В.П. Хоценко-биле телефонга база катап харылзашкан түңнелинде, ук айтырыгга хамаарышкан чамдык байдалдар ылавылаттынган. Шак бо болуушкунга хамаарыштыр ажылды ДУР-нуң армейжи корпустуң командылалы чорудуп турар дээрзин база дыңнаткан. Ынчалза-даа чогуур түңнелдер үндүрери ам-даа билдинмес болуп турар. Шупту улус-биле харылзааны тудуп, бүгү шимчээшкиннерни чурумчудуп алган дээрзин республика Даргазы Владислав Ховалыг медеглеп турар.
Бүгү шериг албанныгларны боттарының быжыглаттынган девискээринде туруштарында турар деп бүзүрелдиг медээ билдинген. Бо байдалды Тываның Чазак Даргазының даалгазы-биле ДУР-же аъттаныпкан төлээлер кыска хуусаа дургузунда ылавылап тодарадыр дээрзин Владислав Ховалыг дыңнаткан. Виталий Павлович Хоценко ДУР-нуң Чазаандан ук айтырыг дээш харыысалгалыг төлээни база тодараткан.
Оон ыңай Владислав Ховалыг февраль 6-ның хүнүнде оперативтиг штабтың хуралын эрттиргеш, мөөңнээшкин-биле кыйгырткан оолдарның шериг кезээнге тодаргай быжыглаттынган турарының талазы-биле айтырыгны база оларның документилерин чогууру-биле долдурган турарын сайгарып, шиитпирлээрин дааскан. Тываның шериг комиссарының оралакчызының дыңнатканы-биле шупту мобилизастаттынган шериглер "Алушта" деп ниити армейжи системада бүрүткеттинген база чогуур акша хандырылгазын ап турар.
Айтырыг Тываның Чазааның шыңгыы кичээнгейи-биле чогур хыналдада турар. Ажыл ам-даа уламчылаар.
А.Донгак белеткээн.