Бөгүн Тываның Баштыңы 2026 чылда Тывага Тургузукчу күш-ажылдың болгаш өг-бүле ыдыктарының чылын эрттирер дугайында чарлыкка атты салган. Республиканың Баштыңы оргкомитетти тургузарын база чылдың темазынга дүүштүр хемчеглерниң делгереңгей планын тургузарын документизинде айыткан. Январь төнчүзүнде Владислав Ховалыг ТР-ниң Дээди Хуралынга Айыткалын берип тура, республикага ол эгелээшкинниң боттандырарын чарлаан.
«Бо ийи билиишкинни каттыштырары бистиң шуптувуска чугула. Тургузукчу күш-ажыл дээрге регионнуң чурттакчы бүрүзүнүң чаагай чоруунуң үндезини, боттарывыстың холдарывыс-биле хөгжүп, бажыңнарны тудуп, келир үени хевирлээр арга-дыр. А быжыг өг-бүле – биске чедиишкиннерже күштү бээр, харыысалгага өөредип, салгалдан салгалче чаңчылдарны дамчыдар тепкииш-тир» - деп, Владислав Ховалыг документиге атты салганын тайылбырлаан.
Ооң-биле чергелештир темалыг чылды чаа күш-ажылчы тиилелгелеринге чедип алырынга, өг-бүлелерни быжыглаарынга база республиканың чурттакчыларын демнештирер боттуг ажыл-херектер-биле сорук киирери чугула деп республика Баштыңы демдеглээн.
Владислав Ховалыг депутаттарга айыткалын берип тура, 2026 чылда «күш-ажыл» деп сөс кол кылдыныг болур ужурлуг деп демдеглээнин сагындыраал. «Ажылынга кызымак – амыдыралга ынакшыл» деп кижиге күш-ажылдың чугулазын айыткан чоннуң мерген чугаазын ол сагындырган. Республика Баштыңының 2026 чылды Тывага Тургузукчу күш-ажылдың болгаш өг-бүле ыдыктарының чылы кылдыр чарлаар дугайында саналын Айыткалдың дыңнакчылары деткээннер.
ТР-ниң Чазааның парлалга албаны.