Бистиң республикавыска Россияның кол эмнелге черлеринден специалистерниң кээп турары арга-дуржулга солчурунуң эң ховар аргазы дээрзин Тываның Баштыңы Владислав Ховалыг демдеглээн.
“Сайыт Михаил Альбертович Мурашко-биле кады кол сециалистер болгаш эксперттер келген. Ол биске эң ховар арга болуп турар. Бөгүн бистиң эмчилеривиске кандыг методиктиг айтылгалар болгаш сагындырыглар бергенин дыңнадым. Ол идеялар болгаш сагындырыглар-биле, шынап-ла, чепсегленип алгаш, эттинип алыр бис. Бөгүн бистиң эмчилеривиске практиктиг дузаны чедирген деп болур. Оон аңгыда бис Михаил Альбертович-биле өске-даа төлевилелдерни боттандырар аргаларны сайгарып чугаалаштывыс. Уругларның республика эмнелгезиниң тудуундан аңгыда туберкулёзка удур болгаш онкология диспансерлериниң тудугларының дугайында Президентиниң даалгаларының күүселдезин база чугаалаштывыс” – деп, Владислав Ховалыг чугаалаан.
Буян Ооржактың тырттырган чуруктары