Тываның Баштыңы Кызылдың объектилерин кезип тура, «Бастион» КХН тускай тудуг заводунуң бүдүрүлге баазазынга четкен. Бүдүрүлге Тываның социал-экономиктиг хөгжүлдезиниң бот-тускай программазындан күрүне деткимчези-биле ажылының күчү-күжүн улгаттырып, тудуг материалдарын болгаш чиик үлетпүр продукциязын бүдүрүп, тус черниң чурттакчы чонунга ажылчын олуттарны ажыдып турар.
Владислав Ховалыг «Бастион» КХН-ниң бодунуң акша-хөреңгизин болгаш ИПСЭР субсидиялары-биле ажыткан элээн каш бүдүрүлге объектилерин, ооң иштинде даараныр мастерскаяны, чук соңга бүдүрер цехти, заводтуң демир-бетон бүдүрүлгезин эргип көрген.
«Бо хире хөй бүдүрүлге цехтери өскелерге чижилгени тургузуп, продукцияның шынарын экижидип, өртектерни тудуп турар» - деп, Владислав Ховалыг объектилерни кезээн соонда, чугаалаан.
Демир-бетон кылыглар заводу 2025 чылда ажылдап эгелээн. Завод тротуар чадар даштарны, хана панельдерин, бордюрларны, фундамент блоктарын болгаш өске-даа тудуг материалдарын бүдүрүп турар.
Заводтуң мастери Александр Кудрявцевтиң чугаазы-биле алырга, оларның бүдүрген ишти хос тудуг блоктарын бажыңнар болгаш гаражтар тударынга садып турар.
Дааранылга цеги регионда тудуг болгаш орук компанияларын, эмнелге албан черлерин, даг-болбаазырадылга бүдүрүлгелерин тускай идик-хеп-биле хандырып турар. Оон аңгыда школачылар формазын даарап, Россияның Камгалал яамызының чагыгларын кылырынга белеткенип турар. Продукцияның шынары фабриканыы ышкаш бедик.
«Массалыг болгаш түүлүг продукцияны — даг-руда ажылдакчыларынга, тудугжуларга болгаш орук ажылчыннарынга чайгы болгаш кышкы ажылчын хептерни даарап турар бис. Ол хептерде тускай камгалалдыг чырыыр чүүлдерни киирген. Чагыглар хөйү-биле кээп турар, ынчангаш мурунувуста улуг ажылдар манап турар» - деп, даараныр цехтиң удуртукчузу Марина Верник чугаалаан.
Ол-ла бүдүрүлге шөлүнде чуктан соңгалар бүдүрер цех база ажылдап турар. Чоокта чаа кожа регионнарның бүдүрүкчүлеринден соңга шилдерин садып ап, бүдүрүп эгелээни продукция чүгле кижилерге эвес, а тус черниң тудуг компанияларынга база дыка херектиг болганын ажылчыннар демдеглээн.
Компания бир шакта 90 тонна күчүлүг асфальт-бетон бүдүрүлгезин ажыдарын планнап турар.
«Бастион» тудуг заводу КХН-ниң удуртукчузунуң оралакчызы Александр Чижиков эрткен чайын ИПСЭР акшазы-биле асфальт-бетон заводунга дериг-херекселдерин садып алганын чугаалаан. Күзүн оларны эптеп дооскан, удавас ону ажыдар планныг. «Заводтуң баазазынга автомобиль оруктарын тудар болгаш септээр, ол ышкаш бажың чоогунуң шөлдерин чаагайжыдарын планнап турар бис» - деп, ол тайылбырлаан.
Тываның Экономиктиг сайзырал яамызының дыңнатканы болза, Тывага бот-тускай хөгжүлде программазы-биле эрткен чылын бүдүрген продукцияның ниити хемчээли барык 300 муң кубометр болган. Бетон, бетон холуксаалары, демир-бетон кылыглары бүдүрер төлевилелдер деткимчени алган.
Республика Баштыңының чугаазы-биле алырга, регионнуң иштинде тудуг материалдарының бүдүрүлгезиниң хемчээлин улгаттырганы сөөлгү чылдарда республикада тудуг ажылдарының өскен хереглелинге дүгжүп турар деп, республиканың Баштыңы чугаалаан. Владислав Ховалыг ИПСЭР программазының деткимчези-биле республика тудуг материалдарынга бодунуң хереглелин хандырып шыдаар апарганын демдеглээн.
ТР-ниң Чазааның парлалга албаны.
Чиңгис СААЯНЫҢ тырттырган чуруктары.