Россияның чорудуп турары тускай шериг операциязының үезинде Украинаның Чепсектиг күштериниң дроннары Россияның төп болгаш мурнуку регионнарынга ужуп кээп тургулаан. Сибирьниң девискээринде объектилерже украин дроннарның халдаашкыннары демдеглеттинген. Чоокку хүннерде дроннар Иркутск облазынга база ужуп келгилээн.
Ооң-биле холбаштыр Тываның Баштыңы Владислав Ховалыг республиканың чурттакчы чонунга медеглелинге дүвүрээринге үндезин чок деп демдеглеп, чаңгыс чер чурттугларын чылдагаан чок байдалга девидевезинче кыйгырган. Иркутск облазынга болуушкунга хамаарыштыр барымдаа чок болгаш меге дамчыыр чугаалар тарап турарын Владислав Ховалыг демдеглеп, дүвүрээзинниг байдалды доюлдурбазынга чурттакчы чон туруштуг болур херек деп айыткан.
“Дамчыыр чугааларны херекке албайн, оларны тарадырынга киришпейн, чүгле албан ёзузунуң информастыг дыңнадыгларынга бүзүрээрин шупту чаңгыс чер чурттугларымдан дилеп тур мен. Айыыл чок чоруктуң хемчеглерин Иркутск облазынга, Бурятияда күштелдирген. Тываның чепсектиг албан черлеринге чугула херек айтыышкыннарны берген. Тайбың чурттакчыларның амыдыралынга болгаш кадыынга айыыл чок. Девидээринге үндезин база чок. Кичээнгейлиг болуп, меге медээлерни таратпайн, тургустунуп келген байдалга турум чорукту болгаш корум-чурумну тударынга кижи бүрүзү дузалаар ужурлуг” — деп, Владислав Ховалыг социал четкилерде бодунуң блогунга бижээн.
Сибирьже дроннарның баштайгы халдаашкынының үнген черин чок кылган, тайбың кижилерниң чуртталгазынга болгаш кадыынга айыыл чок дээрзин Иркутск областың губернатору Игорь Кобзев социал четкилерде бодунуң блогунга ооң мурнунда бижээн турган. Средний суурда шериг кезээнче украин дроннар халдаан болган. Халдаашкын болган черде оперативтиг болгаш чепсектиг албан черлериниң, Федералдыг айыыл чок чорук албанының (ФАЧА), ОБЯ-ның ажылдакчылары, Росгвардияның дайынчылары ажылдап турар. Ол районда айыылга удур белениниң чурумун тургускан.
Ш. МОҢГУШ белеткээн.
Чурукту интернеттен алган.
«Шын» №21 2025 чылдың июнь 5