«Шын» 12+

Владислав Ховалыг Кызыл-Хая суурда школа тудуун хынаан

19 ноября 2026
1

Республиканың Баштыңы Тываның кыдыг-кызыгаар Мөңгүн-Тайга кожууннуң Кызыл-Хая суурда чаа школа тудуун база катап хынаан. Владислав Ховалыг өөредилге чериниң тудуун бодунуң контролюнда алган. Бо сезон дургузунда ол кызыл-хаяжыларның республика удуртулгазынга кол чагыы болган объектиге ийи катап четкен.

«Бедик даглыг черниң аргыжылгазында болгаш материалдар хандырылгазында бергедээшкиннер турза-даа, даштыкы болгаш иштики ажылдарны дүргедедип, ажылдар калбаа-биле чоруп турар. Амгы үеде объектиде 100 хире кижи хаара туттунган. Бригадирлер болгаш ажылчыннар-биле чугаалаштым, материалдарның шынарын хынап, ажылдың темпизин көрдүм»— деп, Владислав Ховалыг бодунуң блогунга бижээн.

1963 чылда туткан амгы школаның орнунга, 176 олуттуг, спорт залдыг амгы үениң үш каът оран-савазын тудуп турар. Школа көдээ уругларга бедик шынарлыг билиглерни бээр.

Владислав Ховалыг тус черниң чурттакчыларынга объектиниң ужур-дузазын демдеглээш, өөредилге албан чериниң ажыдыышкыны бүдүн суурнуң моон соңгааргы хөгжүлдезинге перспективаларны ажыдар онзагай болуушкун-дур деп айыткан.

Тываның Баштыңы бо чылдың июль, сентябрьда объектини хынап турда, тудугну хуусаазында доозары-биле ажылдың темпизин болгаш ажылчыннарның санын бедидерин тудуг черинге дааскан.

Бо удаада Владислав Ховалыг ажылдың шынарын кудулатпайн, дүргедедирин айтып, а харыысалгалыг ведомство ажылдың шынарын база хуусаазын хыналдага алыр даалганы берген.

А. МОНГУШ.

Чиңгис СААЯНЫҢ тырттырган чуруктары.

«Шын» №45 2026 чылдың ноябрь 19

"Шын" солуннуң МАХ-каналынга каттыжыңар: max.ru/channel_shyn

ШЫН Редакция