Тывага Президент В. Путин кээп чораан
Россияның Президентизи Владимир Путинниң Тывага кээп чорааны республикага чугула ниитилел-политиктиг болгаш социал-экономиктиг болуушкун болган.
Сентябрь 2 – Президентиниң Тывага кээп чораан хүнү. Россияга 2024–2025 чылдарның чаа өөредилге чылының эгелээн хүнү болган төлээде, Кызыл хоорай чоогунда Вавилин ээтпээнде ажыттынган, Төрээн чурттуң Маадырлары аттыг 20 дугаар школаны барып көрүп, өөреникчилерге болгаш башкыларга чаа школага оларның өөренип, ажылдап эгелээни-биле байырны чедирген.
Чаа школаның өөреникчилери-биле «Чугула чүүл дугайында» деп ажык кичээлди Владимир Владимирович эрттирген. Амгы үениң салгалынга чугула чүүлдер дугайында Президент уруглар, оолдар-биле чугаалажып, бистиң республиканың чурттакчылары тускай шериг операциязында киржип турарын оюп эртпээн. «Тыва Республиканың 10 муң ажыг чурттакчылары тускай шериг операцияга эң идепкейлии-биле киржип, боттарының кадыкшылын, амы-тынын камнавайн, силерниң кижи бүрүзүн болгаш бүгү чуртту камгалап турар. Ол дээрге бистиң төрээн чуртувуска онзагай хамаарылганың, патриотизмниң кайгамчыктыг үлегер-чижээ-дир» — деп, Владимир Путин чугаалаан.
«Чугула чүүл дугайында» ажык кичээл үезинде уруглар Президентиге боттарының сонуургаан айтырыгларын салып, солун болгаш өөредиглиг харыыларны дыңнааннар. «Силерден чүнү үлегер кылдыр ап болурул?» – деп айтырыгга «Мен эвээш удуур-дур мен. Ону үлегер-чижек кылдыр менден алба. Сен спорттуң аңгы-аңгы хевирлеринге хандыкшыыр, кезээде шимченгир, күштүг болур дээш, эвээш-ле дизе, сес шактан эвээш эвес эки удуур ужурлуг сен» — деп, Владимир Путин харыылаан.
Республикага анаа аян-чоруктап эвес, а Тыва Арат Республика Россияга эки тура-биле каттышканының 80 чыл юбилейин демдеглээриниң бүдүүзүнде аалдап келгенин Президент уругларга дыңнаткан.
Тываның социал-экономиктиг хөгжүлдезиниң айтырыгларынга хамаарыштыр чөвүлел хуралды Президент В. Путин эрттирген. Президентиниң Сибирь федералдыг округта төлээзи Анатолий Серышев болгаш федералдыг чергелиг албан-дужаалдыг сайыттар ол хуралга киришкен.
Тыва Республиканың экономиказының кедилиг айтырыгларын, регионнуң социал-экономиктиг хөгжүлдезиниң хууда программазында чаартылгаларны, чаа сорулгаларны Россия Федерациязының Президентизиниң эрттирген чөвүлел хуралынга чугаалашкан. Бистиң республиканың социал-экономиктиг хөгжүлдезиниң айтырыгларын Президентиниң деңнелинге сайгарып көргени Тывага бүгү талалыг деткимчениң дыка бедик чадазы-дыр.
Тываның социал-экономиктиг хөгжүлдезиниң хууда программазының бирги ээлчээн болгаш национал төлевилелдерни боттандырганы республикага чаа бүдүрүлгелерни ажыдар, чаа социал объектилерни тудар, регионнуң чурттакчыларының ажыл чок чоруун кызырар, чоннуң амыдырал-чуртталгазының байдалын экижидер, чуртталга бажыңнарын көвүдедир тудар арганы чиигелделиг ипотека бергенин Владислав Ховалыг хуралга илеткээн.
Чөвүлел хуралдың түңнелдери регионга кончуг чугула ужур-дузалыг болганын, Тыва Республиканың социал-экономиктиг хөгжүлдезиниң хууда программазының ийиги ээлчээн Россияның Президентизи деткээнин Тываның Баштыңы Владислав Ховалыг хурал соонда айыткан.
«Тыва Арат Республика ССРЭ-ниң составынче эки тура-биле киргениниң 80 чыл юбилейи бүгү чурт чергелиг болуушкун-дур дээрзин Президент демдеглээн. Тыва Арат Республика аңгы бот-догуннаан күрүне тургаш-ла, немец фашистиг эжелекчилер-биле дайынга Совет Эвилелинге өске күрүнелерни мурнады дузалажып кирипкенин Владимир Путин онзалап айыткан» — деп, Владислав Ховалыг хурал соонда чугаалаан.
Ш. МОҢГУШ белеткээн.
Буян ООРЖАКТЫҢ болгаш Чингис Сааяның тырттырган чуруктары.
“Шын” №67 2024 чылдың сентябрь 4