Бөгүн, июнь10-да, Чазактың аппарат хуралынга республика девискээринде оруктарның байдалын экижидер дугайында айтырыгны чугаалашкан.
Федералдыг болгаш республика чергелиг оруктарда септелге ажылдарының хемчээли чылдың-на улгадып турарын Чазак Даргазы Владислав Ховалыг демдеглээн. Тываның оруктарынга машиналыг чорууру таарымчалыг апарган деп чугаалаан. Шак ындыг түңнелди чедип алырынга “Айыыл чок болгаш шынарлыг автооруктар” деп национал төлевилелге харыысалгалыг киржилге идигни берген.
“Бистиң республикавыста национал төлевилел бүрүзү – эң-не чугула айтырыгларны шиитпирлеп алырынга федералдыг бюджеттен деткимче алыр арга” – деп Чазак Баштыңы бодунуң ТГ-каналынга бижээн.
Амгы тудуг сезонунуң үезинде Тывада 60 ажыг улуг хемчээлдиг орук ажылдары чоруп турарын В.Ховалыг дыңнаткан.
“Улуг хемчээлдиг деп чугаалап турарывыстың чылдагааны, бис чүгле федералдыг болгаш республика чергелиг оруктарны тудуп, септээринден аңгыда, Кызылда 13 участокта болгаш республика девискээринде 11 көвүрүглерни, кожууннарда 28 объектини кылып эгелей берген бис. Улуг кичээнгейни орук озал-ондаа болган участоктарже угландырган.
2027 чылга чедир 308 километр регионалдыг ужур-уткалыг оруктарны нормага дүүштүр кылыр ужурлуг бис. Ол ышкаш тус черлерде 46 километр орукту септээри көрдүнген.
"Ындыг-даа болза оруктарның шынары экижээн тудум, кижилерниң амы-тынындан чарылган орук озал-ондактарының саны өзүп турар. Статистикадан алырга, эки шынарыг оруктарга чолаачылар машинаның нормада көрдүнген режимин хажыдып, дурген халдып чорааш, удур келген орук шимчээшкининче бо-ла үндүр халды бээр болуп турар” –деп, регионнуң удуртукчузу ол талазынче кичээнгейни күштелдирген.
Оон аңгыда, эзирик байдалга машина башкарып чораан барымдаалар көвүдеп турар. Чүгле ийи хонук дургузунда Боом дааның чанында орукка хыналда үезинде 23 эзирик байдалдыг чолаачы туттурган. Шак ындыг улустуң орук шимчээшкининиң киржичилерин хүндүлеп билбезиниң уржуундан аар автоавариялар болуп турар.
Аппарат хуралының түңнелинде Чазак Даргазы Орук-транспорт яамызынга айыыл чок чорукту экижидер сорулгалыг хемчеглерден ажылдап кылгаш, ниитилелди хаара тудуп, негелделиг ажылдаарын дааскан.