Дүүн, январь 12-де, Россия Федерациязының Прокуратура хүнүн демдеглеп эрттирип турар. Тываның Баштыңы Владислав Ховалыг бодунуң албан езузунуң телеграм-каналынга ведомствонуң ажылдакчыларынга болгаш хоочуннарынга профессионал байырлалы-биле байырны чедирген. Хоойлу-дүрүм болгаш корум-чурум сагылгазын база республиканың бүгү чурттакчыларының сонуургалдарын камгалаарын хандырып турар кижилерни бо хүн демдеглээри-биле онзагай хүн болур деп ол демдеглээн.
Кызымак күш-ажылы, улуг арга-дуржулгазы, мерген угааны-биле амгы чедиишкиннерниң быжыг үндезинин салып, аныяк прокурорларга идегелдиг дагдыныкчы болуп чоруур албанның хоочуннарынга регионнуң удуртукчузу онза өөрүп четтиргенин илереткен.
«Эрге-хоойлуну быжыглаарынга, чөптүг чорукту деткииринге, хамаатыларның эргелерин камгалаарынга силерниң ролюңар канчаар-даа улуг. Быжыг кадыкшылды, кызыгаар чок күш-шыдалды, өг-бүлеңерге чаагай чорукту, Тываның болгаш бүгү Россияның сайзыралы дээш силерниң харыысалгалыг ажыл-чорудулгаңарга моон-даа соңгаар чедиишкиннерни күзедим» — деп, Владислав Ховалыг байыр чедириишкининде бижээн.
Россия Федерациязының Президентизиниң 1995 чылда чарлыы-биле Прокуратура ажылдакчызының хүнү тургустунган. 1722 чылдың январь 23-те (эрги сан-биле январь 12) Пётр I-ниң чарлыы-биле, күрүне эрге-чагыргазының дээди хоойлужудулга органының чанынга чиңгине прокурорнуң албан-дужаалын бир дугаар киирип, Россияга прокуратура албан черин үндезилээни-биле байырлалды чарлаан.
2025 чылда Тыва Республиканың Прокуратуразы тургустунганындан бээр 90 чыл оюн демдеглээнин сагындыраал. 1935 чылдың октябрь 28-те Тыва Арат Республиканың Биче Хурал Президиумунуң 21-ги хуралынга, Тыва Арат Республиканың прокуратуразын тургузарының дугайында чарлык база күрүне прокурорунуң дугайында бирги дүрүм үнген. Тыва Арат Республиканың бир дугаар күрүне прокурорунга Пиринлей Кара-Сал томуйлаттырган.
ТР-ниң Чазааның парлалга албаны.