Тываның Баштыңы Владислав Ховалыг январь 20-де Москвага ажыл-агыйжы сургакчылаашкын үезинде Россияның энергетика сайыды Сергей Цивилев-биле ужурашканын бодунуң телеграм-каналында дыңнаткан. Ужуражылгага республиканың энергетика комплекизиниң амгы үеде ажылын база келир үеде ону хөгжүдерин чугаалашканнар.
Владислав Ховалыг Тывада одалга сезону канчаар эртип турарын сайытка таныштырган. Чамдык черлерде 50 градус чедир соок-даа болза, регионнуң шупту амыдырал-хандырылга объектилери, ооң иштинде энергетика бүдүрүлгелери улуг үрелиишкиннер чокка ажылдап турар. Чурттакчы чон, үлетпүр болгаш социал объектилери чылыг болгаш электри энергиязы-биле хандыртынган деп, ол демдеглээн.
Сергей Цивилев Тываның инвестиция төлевилелдериниң 2025 чылда энергетика хандырылгазының комплекстиг планы-биле тодаргай танышкан. Сөөлгү чылда ийи улуг — Туран биле Кызыл подстанцияларын чаартып, ажыглалче киирген. Ооң түңнелинде чырыктың күчү-күжү 330 МВА чедир улгаткан, ынчангаш хөй санныг чуртталга бажыңнарын, социал болгаш үлетпүр объектилерин тудар арга тургустунган.
Саян-Шушенский ГЭС-тен Тываже электри энергиязын дамчыдып турар Хакасияның «Означенное» подстанциязын эде чаартканы онзагай болуушкун болган. Ооң күчү-күжү 1,5 катап улгадып, 2400 МВА чедип, аңаа дүүштүр республикаже берген энергияның хемчээлин база электри хандырылгазының бүзүрелдиин улгаттырган.
Тываның Баштыңы Сергей Цивилев-биле чугаа үезинде, энергетика адырының хөгжүлдезинде республикада тургустунуп келген чидиг айтырыгларны база көдүрген.
«Эде чаартылга ажылдары шагда-ла негеттинип келген республиканың чырык четки ажыл-агыйын хөгжүдеринге херектиг хемчеглер планын сайгарып көрдүвүс. Ужуражылганың түңнелинде, энергетика адырында федералдыг болгаш регионалдыг эрге-чагырга органнарының күжениишкиннерин дүүштүрер моон соңгааргы базымнар дугуруштунган» - деп, Владислав Ховалыг бодунуң блогунда бижээн.
Владислав Ховалыг 2021 чылда Инвестиция төлевилелдериниң энергетика хандырылгазының комплекстиг планынга федералдыг чөпшээрелди алганын сагындыраал. Планда бедик вольтулуг немелде шугумну тудары кирген, ол Тываның электри четкизиниң күчү-күжүн 180 МВт-тан 240 МВт чедир улгаттырар ужурлуг.
Чаа киирер күчү-күш амгы үеде дизельдиг генераторлар ажылдап турар Тожу кожуунну чырык-биле хандырып, ажыктыг казымалдар тывыжында улуг төлевилелдерни болгаш Тываның найысылалын хөгжүдеринге электри энергиязы-биле хандырар арганы бээр. Россияның Чазаандан Чазак Даргазының бирги оралакчызы Денис Мантуров ол планның күүселдезин хайгаарап турар.
ТР-ниң Чазааның парлалга албаны.