Республика девискээринде COVID-19 халдавырлыг аарыгдан аараан улустуң саны немежип турарын барымдаалааш, Тыва Чазак дарый хемчеглерни ап эгелээн. Эмнелге черлеринге хөй чонну тырывазы-биле И.Ярыгин аттыг спорткомплекске түр када ковид-госпитальды ажыдар дээнин ТР-ниң Чазак Даргазының бирги оралакчызының хүлээлгезин күүседип турар Александр Брокерт дыңнаткан:
"ТР-ниң Баштыңының албан-хүлээлгезин күүседип турар Владислав Ховалыгның даалгазы-биле немелде оруннарны И.Ярыгин аттыг спорткомплексте салып эгелээн бис. Аңаа коронавирус хамчыктыг аарыгның чиик хевирин эрттип турар болгаш ам-даа чедир эмнээшкин алыр аарыг улусту чыттырары көрдүнген" -деп, ол бижээн.
Владислав Ховалыгның бодап турары-биле, эмнелгелерде чыдар өске аарыгларлыг улустарны база кичээнгейге ап, ол аарыг улус кырынче коронавирустан аараан улусту чыттырып, эмчилерниң-даа, эмнелге черлериниң-даа ажылын нарыыдатпазы-биле немелде ковид-госпитальды ажыдар дээн чылдагааны ында. Халдавырлыг бо аарыгны бичии-даа болза чавырылдырар сорулга-биле, бүгү болдунар аргаларны ажыглаары чугула.
Сагындырып каалы, коронавирустан аар аарып турар улус Республиканың халдавырлыг аарыглар эмнелгезинде, Терапия корпузунун базазында болгаш чаа "Ковид-төпте" эмнээшкинни ап турар. Амгы үеде 2297 аарыг улус эмнээшкинни ап турар. Кызылдың стационар госпитальдарында берге байдалда - 142 кижи чыдар. ИВЛ -3, НИВЛ аппаратта- 21 аарыг улусту кошкан. Эрткен хонукта эмчиже 107 кижи кирген. Хостуг оруннар фондузу 19, 7 хуу болуп турар.
#ТываЧазак#Стопкоронавирус#Шынсолун#тувамедиагрупп #Тува #Тыва #Tuva #TMG #TMGNEWS #Tuvanews