Волонтерлар – эрес-дидим болгаш буянныг кижилер

Декабрь 5-те Волонтерлар хүнүн чылдың-на демдеглеп турар. Тыва Республиканың Аныяктар херектериниң талазы-биле агентилелдиң удуртукчузу 2022 чылда Тывага волонтерлар шимчээшкининиң ажыл-чорудулгазын тайылбырлаан.

Бо чылын республикага волонтерларның киржилгези-биле 182 янзы-бүрү хемчеглерни эрттирген бис, эрткен чылга бодаарга, үш катап хөй болган. Ооң аразындан эң-не онзагай болуушкуннарны демдеглеп болур, ол дээрге Россияның хостуг хүрешке чемпионады, «Кады бис» аныяктар шимчээшкининиң шупту акциялары, «Тываның командазы» шуулганны эрттиргени-дир» – деп, Эртине Куулар чугаалаан.

Тывада эки турачылар 4 бөлүкке хувааттынган: школачылар, студентилер, ажылдап турар аныяктар база улуг назылыг «мөңгүн волонтерлар».

Россияда волонтерларны бүрүткеп турар «Добро.ру» порталдың медээзи-биле алырга, Тывада 10 муң ажыг эки турачылар албан езузу-биле бүрүткеттинген. Ынчалза-даа буянныг ажыл-херектер кылып турар кижилерниң саны оон ийи катап хөй. Эң-не чалыы волонтерларның назыны 7 хардан эгелээн.

Бо чылын барык 500 кижи «Добро.Университет» өөредиглиг курстарга өөредилгени эрткен. Эки турачылар ол платформага аңгы-аңгы онлайн-курстарны эртип турар: дилеп-тывар ажылдар, донорлаары, төөгүнүң болгаш культураның тураскаалдарын камгалаары, социал төлевилелдер дээш өске-даа.

«Кады бис» волонтерлар шимчээшкини хүннүң-не кижилерге дузазын көргүзүп турар, ол дээрге улуг хемчеглер эрттиреринге дузалаары, хүн бүрүнүң ажылы, чижээлээрге, мобилизастаттынган дайынчының өг-бүлезинге кышкы одаар ыяш-хөмүрүн дүжүрүп бээр азы Ада-чурттуң Улуг дайынының хоочунунуң бажың-балгадын аштап-арыглаар дээн ышкаш.

«Волонтерлар ажылдан кортпас, олар ак сеткили, буяны-биле дузазын көргүзүп чоруурлар» – деп, Эртине Куулар демдеглээн.

Республиканың эң-не кол эки турачызынга «Тываның буянныг чүректери» шимчээшкинниң тургузукчузу Артыш Монгушту адап болур. «Буянныг чүректер» кижилерге ачы-дуза көргүзеринден аңгыда, өөредиглиг акцияларны чорудуп турар. Олар Волонтерлар хүнүнүң бүдүүзүнде Кызыл хоорайның солагай талакы эриинде дачаларның чурттакчыларынга ээлчеглиг «Буянныг кичээлди» эрттирген. Хемчег үезинде эки турачылар боттарының волонтер ажылының дугайында чугаалап бергеш, социал төлевилелдерин таныштырган.

Байырлал хүнүнде агентилелдиң удуртукчузу бодунуң блогунга волонтерларга байырын чедиргеш, олар эң-не эрес-дидим болгаш буянныг кижилер-дир деп демдеглээн.

«Волонтерлар дээрге кандыг-даа дузаны ак сеткили-биле кылырынга кезээде белен чоруур кижилер-дир. Республикада болуп турар хемчеглерниң хөй кезии оларның киржилгези чокка эртпес. Олар чамдыкта айыылга таваржып-даа болур, эң-не берге болгаш нарын ажылдарны кылып турар. Ак сеткилиңер болгаш эки чүүлче чүткүлүңер дээш шуптуңарга четтиргенивисти илередир-дир бис. Эки турачылар хүнү-биле!» деп, ол бижээн.

А.СОЯН белеткээн.