1941–1945 чылдарда Ада-чурттуң Улуг дайынын тиилээнинден бээр 80 чыл оюн демдеглээр улуг хемчээлдиг байырлалга Тываның чурттакчылары волонтёрлар кылдыр киржип болур. Тиилелгеге тураскааткан хемчеглер бүдүн 2025 чылдың дургузунда Россия Федерациязының бүгү субъектилеринге болуп эртер.
Аныяктар херектериниң талазы-биле федералдыг агентилел болгаш «Тиилелгениң волонтерлары» Бүгү-российжи ниитилел шимчээшкини Тиилелгениң мугур оюн демдеглээриниң чаңгыс аай концепциязын ажылдап кылганнар. Бо ажылды кылып чорудары-биле волонтерларның регионалдыг тѳптери тургустунар.
Волонтерлар корпузун белеткээр регионалдыг тѳптер ѳѳредилге албан черлериниң, эки турачы чорукту сайзырадыр курлавыр тѳптериниң баазазынга болгаш Тиилелгениң волонтерларының регионалдыг салбырларынга ажыттынар кылдыр планнап турар. Эки турачылар тускай ѳѳредилгени эртер: тѳѳгүнү сактып, патриотчу хемчеглер эрттирериниң арга-мергежилдерин шиңгээдип ап, тайм-менеджментиге болгаш кижилер-биле харылзаалар тударынга ѳѳренирлер.
2025 чылдың октябрь–ноябрьда эки турачылар Волонтер корпузунуң Ада-чурттуң Улуг дайынынга Тиилелгениң 80 чылдаанынга тураскааткан Делегей шуулганынга киржир.
Регионнарга волонтерлар тѳптериниң ажыдыышкыны ноябрь айда чаңгыс хүнде деңге болур. Эки турачыларның бүрүткели 2024 чылдың октябрь айда кѳрдүнген. Тодаргай медээлер-биле волонтерыпобеды.рф сайтызындан таныжып ап болур.
/ Тываның Чазааның медээлеринден.
«Шын» №72 2024 чылдың сентябрь 21