Тываның Баштыңы Владислав Ховалыгның даалгазы-биле тускай шериг операциязының айтырыгларының талазы-биле тускай төлээзи Тимур Куулар «Восток» бөлүүнүң дайынчыларынга техниктиг херекселдерни чедирип хүлээткен. «Восток» бөлүүнүң дайынчыларының Запорожье угланыышкынынга чедиишкиннерин чурттуң Президентизи Владимир Путин онзалап демдеглээнин сагындыраал.
«Тыва фронтуже эң-не чугула херек чүүлдерни чорудуп турган база ам-даа чорудар. Бо удаада 20 ужудукчу чок ужар аппаратты база 8 мотоциклди дайынчыларга дамчыттывыс» — деп, Владислав Ховалыг социал четкиде бодунуң арнынга дыңнаткан.
«Восток» бөлүүнүң составында 5-ки болгаш 35-ки армиялар, 127-ги гвардейжи дивизияның кезээ, 38-ки бригада кирип турар.
Ол кезектиң чедиишкиннериниң дугайында Россияның Президентизи Владимир Путин май айда «Время героев» деп дамчыдылганың доозукчулары-биле ужуражылга үезинде онзалап демдеглээн.
«Бөгүн Запорожье угланыышкынында бистиң «Восток» биле «Днепр» бөлүктериниң дайынчылары боттарының дайынчы даалгаларын чедиишкинниг, төлептиг күүседип турар. Шиитпирлиг чоруп олурарлар. Хүннүң-не» — деп, ынчан чурттуң Баштыңы чугаалаан.
Чурттуң шупту шериг кезектеринде дайынчыларга төрээн республиказындан гуманитарлыг дузаны чедирип турар дээрзин Владислав Ховалыг демдеглээн.
Ол ышкаш республиканың удуртукчузунуң даалгазы-биле тускай шериг операциязының айтырыгларының талазы-биле тускай төлээзи Тимур Куулар Тыва Республиканың «Тускай шериг операциязының киржикчизи» деп тураскаалдыг медальдарны дайынчыларга тывыскан.
Амгы үеде Тывада Республиканың Баштыңының база Улусчу фронтунуң регионалдыг салбырының, Дээди Хуралдың (парламентиниң), Хөй-ниити палатазының база Тыва Республиканың Ада-чурттуң дайынчыларының өг-бүлелериниң комитединиң деткимчези-биле гуманитарлыг чүъктү июль айның төнчүзүнде чорударын планнап турар. «Шупту чүүлдү Тиилелгеже!» деп чайгы гуманитарлыг чыылда уламчылавышаан. Марафон бүгү кожууннарда волонтёрлар шимчээшкинин каттыштырган.
Кол сорулгазы — Тываның дайынчыларынга гуманитарлыг дузаны хөйү-биле чыыры.
/ Бистиң корр.
Чурукту ТР-ниң Чазааның парлалга албанындан алган.
“Шын” №26 2026 чылдың июль 9
"Шын" солуннуң МАХ-каналынга каттыжыңар: max.ru/join/egenQ...