Россияның улуг банкыларының бирээзи чыл төнчүзүнге чедир Тывада боттарының бир дугаар төлээ черин ажыдар. 2024 чылда Петербургтуң делегейниң экономиктиг шуулганының үезинде, Тываның Баштыңы Владислав Ховалыг биле ВТБ банкының баштаар чериниң даргазы Денис Бортниковтуң аттар салганы кады ажылдажылга дугайында дугуржулгазы-биле, Кызылдың төвүнге ВТБ банкының бирги офизин декабрь 16-да ажыдар.
Тывага ажыттынар ВТБ банк күрүне деткимчезиниң арга-хевирлерин ажыглаан тудуг ажылы дээн ышкаш регионалдыг компанияларны хөгжүдер стратегтиг төлевилелдерге, биче болгаш ортумак бизнести акшаландырарынга киржир планныг. Чуртта улуг саң-хөө организациязын төлээлээн, үүрмек бизнестиң хемчээли-биле Ажаалга банкызының соонда ийиги черде ВТБ банкының хөй янзы ачы-дузаларын республиканың чурттакчылары алыр.
Тываның Баштыңы Владислав Ховалыг ВТБ-ниң социал харыысалгазын онзалап айыткан турган. Республикага банкыны албан езузу-биле ажыдар мурнунда-ла, ол Тываны 2023 чылда «Карак чажы чок өртемчей» деп боттарының ачы-буян программазынче киирген. Ооң дузазы-биле республиканың уруглар эмнелгези сурдологтуг болгаш офтальмологтуг дериг-херекселдер комплекизин алган. Денис Бортников республиканың болгаш ооң чурттакчыларының чаагай чоруун бедидер дыка хөй төлевилелдерни кады боттандырарынга идегелин илереткен.
Республиканың саң-хөө сайыды Орлан Достай биле ВТБ банкының Красноярск крайда башкарыкчызы Александр Ванюшкин Тываның Чазаанга ажылчын ужуражылганы эрттирип, регионда саң-хөө адырының хөгжүлдезиниң кол эгелээшкиннерин, ол ышкаш чурттакчы чонга болгаш бизнеске банк ачы-дузазының чедингирин бедидериниң аргаларын республикада ВТБ банкыны ажылдадыр бүдүүзүнде чугаалажып көрген.
ВТБ банк Тываның чурттакчы чонунуң саң-хөө билиглерин хөгжүдер, бодунуң акша-шалың шугумун база регионда банк ачы-дузазының чедингирин калбартыр, Кызылга болгаш Тываның кожууннарынга хүннүң-не ажылдаар банкоматтарны тургузары-биле бодунуң стратегиязын саналдаан. Тывада боттандырган чиигелделиг ипотека программазынга банк баштай-ла киржир күзелин илередип турган.
Красноярск крайда, Хакас база Тыва республикаларда ВТБ бөлүктүң ортумак болгаш биче бизнес клиентилериниң чээли портфели 2024 чылдың май 1-ге чедир 76,2 хире млрд рубль, хаара туттунган акша-хөреңги портфели 50,6 млрд рубль болган. Хууда кижилерге ачы-дуза чедирилгезинде ол көргүзүглер тус-тузунда 142,4 млрд болгаш 116,5 млрд рубль четкен.
А. МОНГУШ.
«Шын» №90 2024 чылдың ноябрь 23