Декабрь 23-те Кызыл хоорайның төвүнге ВТБ банкының ажыдыышкыны болуп эрткен. ВТБ – Россияда база бир улуг саң-хөө организацияларының бирээзи. Республиканың чурттакчы чону болгаш улуг бизнестиг сайгарлыкчылар ВТБ банкызының ачы-дузазын ап болур.
«Тываның стратегтиг хөгжүлдезинге ВТБ банкының ажыттынганы улуг рольду ойнаар. Республикавыстың чурттакчы чонунга ажыктыг банк деп санап турар бис. Сөөлгү үеде интернет четкизин таварыштыр мөлчүкчүлерниң көвүдээни чажыт эвес. Ынчангаш ВТБ банкызының ажылдакчылары-биле кады саң-хөөге хамаарышкан өөредиглиг кичээлдерни регионнуң улуг-биче чонунга эрттирип эгелээр бис. Россияның улуг банкыларының бирээзиниң республикада келгени – тыва чонга улуг болуушкун-дур»– деп, ТР-ниң Саң-хөө сайыдының оралакчызы Айдыс Монгуш чугаалаан.
ТР-ниң саң-хөө сайыдының оралакчызы Айдыс Монгуш болгаш ВТБ банкының Тывада салбырының удуртукчузу Александр Ванюшкин республиканың чурттакчы чонунга саң-хөөге хамаарышкан кичээлдер эрттирер дугайында керээге атты салган.
«Банкының эң-не кол даалгаларының бирээзи– республиканың чонунга чоок болуру. Кижи бүрүзү банкыга келгеш, консультация ап болур. Тус черниң эрге-чагыргазы-биле стратегтиг планны тургускаш, кады ажылдажылганың керээзин чаргаш, ажылдап кирипкенивис бо. Хамааты бүрүзү, өреге бүрүзү-биле болгаш улуг-биче сайгарлыкчылар-биле кады ажылдаарынга белен бис. Саң-хөөге хамаарышкан билиглерни чонга чедирери– бир сорулгавыс. Эң-не кол чүүл – бодунуң акшазын шын чарыгдап билири болгаш мөлчүкчүлерниң оп-мегезинге алыспазы» – деп, ВТБ банкының Красноярск крайда, Хакас болгаш Тыва республикаларда салбырларының удуртукчузу Александр Ванюшкин чугаалаан.
Банкының специалистери баштайгы клиентилерин ол-ла хүн хүлээп эгелей берген.
«ВТБ банкының клиентизи мен. Ооң мурнунда кандыг-бир айтырыглар тургустунуп келирге-ле, Абакан хоорайже баар турдум. Кызылда салбыры ажыттынып келгенинге аажок өөрүп турар мен. Шиитпирлээр айтырыгларым бар. Ынчангаш ажыттынарга-ла, келгеним бо. Четтикпейн манап турдум»—деп, Кызылдың чурттакчызы Айсула Соян өөрүшкүзүн илереткен.
Тываның чурттакчылары ВТБ (ПАО) Банкының офистерин дамчыштыр янзы-бүрү банк ачы-дузазын алыр аргалыг апаар. Тывада боттандырып турар төлевилелдерни акшаландырарынга бо банк киржир сорулгалыг.
Республикага банкыны албан езузу-биле ажыдар мурнунда-ла, ол Тываны 2023 чылда «Карак чажы чок өртемчей» деп боттарының ачы-буян программазынче киирген. Ооң дузазы-биле республиканың уруглар эмнелгези сурдологтуг болгаш офтальмологтуг дериг-херекселдер комплекизин алган дээрзин демдеглээри чугула.
Айдың ОНДАР.
Буян ООРЖАКТЫҢ тырттырган чуруктары.
“Шын” №99 2024 чылдың декабрь 25