Ачы-буян азы кандыг-ла-бир эки чүүл кылганнарга кижилер өөрүп четтиргенин илереди бээр. Өөрүп четтиргенин илередири – кижилерниң сагыш-сеткилиниң эң үнелиг шынарларының бирээзи.
Кижилер бот-боттарынга өөрүп четтиргенин январь 11-ниң хүнүнде илередир чорук интернетке тыптып келген. Чер бөмбүрзектиң чурттакчыларының мөзү-шынарының бо чаагай чүүлүн улам үнелиг болдурар, кижилер ону улам ханы медереп билзин дээш, Каттышкан Нацияларның өөредилге, эртем болгаш культура айтырыгларының талазы-биле организациязы Өөрүп четтиргенин илередир хүннү январь 11-ниң хүнү кылдыр 1994 чылда доктааткан.
Бо хүнде кижилер бот-боттарынга өөрүп четтиргенин илередир чүүл эң ылаңгыя интернетте дыка нептерээн. Бо хүн бүгү делегейде кижилер интернет болгаш телефон-даа дамчыштыр азы ужуражып келгеш, бот-боттарынга дузалашканы азы кандыг-бир эки чүүл дээш өөрүп четтиргенин илередип турар апарган.
Өөрүп четтиргенин илередир хүннү чамдык чурттарда элээн калбаа-биле демдеглеп эрттирип турар. Январь 11-де ачы-буянныг чүүлдер кылган кижилер, эң ылаңгыя эмчилер, башкылар, камгалакчылар дээш өске-даа кижилер-биле ужуражыышкыннарны эрттирип, оларның ачы-буянныг чоруунуң дугайында чыылганнарга чугаалап бээр арга бар.
Россияның хоорайларында Өөрүп четтириишкинни илереткен бижиктерни дайынның болгаш күш-ажылдың хоочуннарынга чедирип, кудумчуларга Өөрүп четтириишкин акцияларын эрттирип, чаагай ажыл-херектерге шылгараан кижилерни алгап-мактап турар апарган. Өөрүп четтиргенин илередир хүн январь 11-де бо чаагай чаңчылды демдеглеп эрттирери бистиң чуртта улам-на калбарып турар.
Бо чаагай хүнде өөрүп четтиргенин сөстер-биле илередири албан эвес – чон бүрүзүнде чаагай чаңчылдар бар. Чижээлээрге, орус чон “Спасибо” деп чугаалап мөгейер, японнар өөрүп четтиргенин мөгейип илередир, эң ылаңгыя январь 11-де оларның мөгейии барык-ла черге чедир чавыс боор. Тывалар-биле ёзу-чаңчылдары болгаш шажын-чүдүлгези чоок төвүттер ийи холдарын бурунгаар сунуп, чолукшуур чаңчылдыг.
Кижилерниң биске чедиргени ачы-буянныг чүүлдерни бөгүн сактып, Өөрүп четтиргенин илередириниң хүнү январь 11-де бот-боттарывыска өөрүп четтиргенивисти илередиилиңер!
Бистиң корр.
Чурукту интернеттен хоолгалаан.