Кижилер бир-ле чүвениң четпезинден хилинчектенип чоруур. Чүгле ядыы кижилер эвес, кыдыра угаанныг дыка бай кижилер база ол човулаңны эдилеп чоруур. Оларга үргүлчү-ле бир-ле чүве четпес, сеткили пөкпес, хөйнү күзеп чоруур.
Чүнү дилеп чор сен? Аас-кежикти, сагыш-сеткилдиң тайбыңын, дыжын. Оларны тып алыр дээш, черниң өске кыдыынче чорба. Ол черден чөгелиң төнген, идегелиң ышкыныпкан, хомудаан сеткилдиг дедир ээп кээр сен. Аас-кежикти, сеткил дыжын чүрээңниң ханызындан тып ал.
Бис технологияларның кулдары болбас, оларны чагырар ээлери болур ужурлуг бис.
Шынчы болгаш чөптүг сеткил – иштики күжүвүстүң үнер дөзү. Шынчы, чөптүг болзуңарза, ону кижилерге көргүзүңер. Ынчан кижилер силерге бүзүрелин көргүзер. Ол бүзүрел сагыш-сеткил каттыштырылгазынга, найыралга чедирер.
Чечектелип турган ыяш күзүн чанагаш апаар, чалыы назынны кырган назын солуптар, нүгүл-хилинчекти буянныг чорук ажып кааптар. Шупту чүве өскерлип, солчур.
Буян башкы очулдурган.
Чурукту интернеттен алган.
“Шын” №14 2025 чылдың апрель 17