Школаларга сөөлгү коңга байырлалдары болурга-ла, бис, улуг назылыг хоочуннар, школачы үелеривисти сактып кээр бис. Ынчангаш эргим ынак школавысты сактып, май 26-да Сүт-Хөл кожууннуң Суг-Аксы ортумак школазынче аъттаныптывыс. Школаның аңгы-аңгы чылдарда (1964, 1965, 1966 чч.) доозукчулары чордувус.
Суг-Аксы ортумак школазын дооскандан бээр 58 чыл эрткени ол-дур. Чаңгыс классчыларывыстың аразында кандыг-даа мергежилдиг кижилер бар. Хөй кезии өске оранче «кызыл-дустап» чоруй баргылааннар.
1964 чылда Суг-Аксы школазын 11 «б» классты доосканывыстан бээр 59 чыл болуп турары ол. Шупту 25 кижи дооскан бис. Бо үеге чедир 2–3-ле кижи артывыс. Аажок хомуданчыг боор чүве-дир.
Ол хүн дыка кааң, аяс эки хүн болган. Школавыс бисти манап турган-даа чадавас. Орук дургаар хөөрежир дээш, Суг-Аксынга келгенивис эскербээн болдувус. Орук аксында субурганнарга тейледивис-даа. Школаның аныяк-чалыы коллективи бисти өөрүшкүлүг уткуп алдылар. Белээвисти сунуп, чурукка тырттырып алдывыс. Школавыс иштинче-даа кирдивис. Эх! Чалыы, чараш үевистиң сактыышкыннары дыка-ла хөй. Часпар үезинде холдарывыс тутчуп алгаш, долгандыр туруп алгаш, ырлажып турганывыс каракка бо-ла чуруттунуп келир.
Школавыс эргижирээн. 2024 чылда капитал септелге кылыр дээнин дыңнааш, аажок өөрдүвүс.
Суг-Аксы школазы хөй чылдар иштинде сагылга-чурумнуг, келир үеде төлептиг кижилерни каңнап кижизиткен. Ындыгларның саны хөй. Чижээлээрге, Маадыр-оол Бартыштаанович Ховалыгны адап болур. Ол школаны 1965 чылда эки өөредилгелиг дооскан. Ол 72 харлыында «Эң улуг назылыг үлетпүр альпинизи» деп атты төлептии-биле алган. Делегейниң Гиннес рекордунче кирген баштайгы тыва кижи болуп турар. Тываның улустуң чогаалчызы, альпинизмниң спорт мастери.
Ховалыг Бартыштаановичиниң өөнүң ишти Рада Дамбаевна 1966 чылда база бо школаны дооскан. Ол товаровед мергежилдиг, садыг шугумунга хөй чылдар иштинде ажылдаан. Бо өг-бүле шыырак эртем-билиглиг 3 кысты төлептиг кижилер кылдыр кижизидип өстүрген.
Бисти эртем-билигже эжиндирип киирип каан, эргим ынак школавыска мөгейип, байырлашкаш, аъттаныптывыс.
Александр ООРЖАК, Күш-ажылдың хоочуну.
"Шын" №45 2023 чылдың июнь 21