Ноябрь 25-те Кызылдың ХБАБ эргелелинге база бир чараш байырлал болуп эрткен. Бо удаада Александр, Людмила Волошиналар кады чурттаандан бээр 50 чыл оюнда алдын кудазын демдеглеп турарын бүрүткеткен. Аңаа ол өг-бүлениң чоок кижилери, уруг-дарыы, эш-өөрү шупту чыглып, ховар болур байырлалдың херечилери болган.
2024 чыл Волошиналарга юбилейлер-биле байлак чыл болуп турар: кады чурттаандан бээр 50 чыл оюнда катап база алдын билзектерни солчуп кеткен, ийи бодунуң 70 харлаан чылы болгаш ТР-ниң культуразының алдарлыг ажылдакчызы Людмила Владимировнаның В.Көк-оол аттыг Национал хөгжүм-шии театрынга ажылдаанындан бээр мугур 50 чыл болганын ооң кады ажылдап турар коллегалары онзагайлап демдеглээн.
Волошиналар, шынап-ла, онзагай өг-бүле. 1974 чылда холдарындан четтинчипкеш, ол олчаан салдынышпайн, эп-найыралдыг, аас-кежиктиг чурттап чорууру мактаксанчыг. Оларның ынакшылының төөгүзү чаптанчыг. Кызылдың дугаары 11 школазынга ынчан Люда биле Саша дижип кыйгыржып чораан чаңгыс классчылар аразынга ынакшыл доозукчулар кежээзинге хенертен кыптыгып келгеш, чылдан чылче өөскүп келген. Ол хевээр эгин-кожа кады чурттааш, ийи оолдуң, үш уйнуктарының ынак ада-иези, кырган-ава, кырган-ачазы болган. Соонда салгакчыларынга үлегер болзун дээш, шак мындыг байырлалды кылып турарын Людмила Владимировна, Александр Георгиевич сактып чугаалаан.
“Боттарывыс бо 50 чылдың эрте бергенин безин эскербейн барган бис. Үениң маңы дыка дүрген-дир. Өг-бүлеге эң-не кол чүүл – хүндүткел, бүзүрел, ынакшыл” – деп, Людмила Владимировна демдеглээн.
Оолдарының улуу Денис ада-иезиниң чараш байырлалынга келгеш, “Ада-иемниң салым-чолу, школачы үезинден тура арыг шынчы ынакшылы биске, шуптувуска, үлегер болгаш сорук киирип турар” – деп чугаалаан.
ХБАБ-ка байырлыг бүрүткелди кылган соонда, аас-кежиктиг хүнүн Волошиналар Кызылдың Воскресенск хүрээзинге улаштырган. Аңаа орус шажынныы-биле дүгдештирер езулал болган. Байырлалдың мөргүлүн Кызылдың епархиязының Амвросий Ада номчаан.
Людмила, Александр Волошиналар 2018 чылда үлегерлиг өг-бүле дээш РФ-тиң Хүндүлел бижии-биле шаңнадып турган.
Өг-бүлениң кандыг-даа материалдыг байлакшылдан күштүг эң-не үнелиг чүүлү – ынакшыл, бүзүрел, хүндүткел дээрзиниң база бир бадыткалы болган өг-бүлеге ол хүн байыр чедириишкиннери үзүктелбээн.
К. МОНГУШ.
Ада ТЮЛЮШТУҢ тырттырган чуруктары.
“Шын” №91 2024 чылдың ноябрь 27