Тывага июнь 15–18 хүннеринде аныяк чогаалчыларныӊ делегей чергелиг фестивалы болур.
Москвадан, Якутия, Хакасия болгаш Моол Республикалардан чогаалчылар келир. Улуг хүндүткел-биле чаладып келир аалчыларныӊ бирээзи Николай Владимирович Переяслов, Россияныӊ Чогаалчылар эвилелиниӊ Баштаар чериниӊ секретары, 50 номнуӊ автору, чогаалчы, кайгамчыктыг очулдурукчу.
«Национал болгаш даштыкы авторларныӊ шүлүктерин очулдурары дээрге, шынап-ла, өске дыл кырында бижип турар коллегаларыныӊ чогаадыкчы ижинче шымныгып кирер тура-соруктуг кижилерге улуг школа-дыр. Шүлүктер очулдурары поэзияныӊ кыдыг-кызыгаарын делгемчидип, очулдурукчуларга болгаш очулдурар авторларга стильдерни болгаш литературлуг аргаларны ажыдып берип турар.
Тыва шүлүктерде одуругларыныӊ эгезинге болгаш төнчүзүнге аяннажылга сагыыры тыва поэзияныӊ бир онзагайы. Делегей поэзиязында кара чаӊгыс ындыг таварылга бооп болур. Ооӊ чижээ кылдыр чогаалчы Артык Ховалыгныӊ шүлүктерин чугаалап болур:
Как ручьи здесь горы украшают!
Как цветы мой дух здесь возвышают!
Мне сияют радостно луга,
Меня манит в глубь свою тайгу!
Ындыг поэтиктиг стиль-биле бир дугаар таваржып турарым ол. Ооӊ соонда Александр Ооржак, Борис Балчий-оол, Оюмаа Ооржак дээш өске-даа авторлар-биле таныштым.
Тыва авторларныӊ чогаадыкчы ажыл-ижи-биле таныжып тургаш, национал уран чогаадылганыӊ кайгамчыктыг ханы сиӊген бодалын билдим. Ол шүлүктерни сеткил өөрүп очулдуруп тур мен. Бүгү Россияда поэзияны үнелеп чоруур кижилер бистиӊ Тыва Республикавыстыӊ шүлүктери-биле таныжып номчаан болза, деп бодаар-дыр мен. Ёзулуг шүлүктер — сүүзүннүг эм-дом дег, кижилерниӊ сагыш-сеткилин күчү-күш, буянныг эки бодалдар-биле долдуруп чоруур. Ол бистиӊ чоннарывыска шуут чедишпейн турар чүүл ол-дур»— деп, Николай Переяслов чугаалаан.
Тываныӊ чогаалчылар эвилелиниӊ Баштаар чери чогаалчы Сайлыкмаа Комбунуӊ удуртулгазы-биле Россияныӊ шылгараӊгай очулдурукчуларын фестивальче чалааш, аныяк авторларныӊ өзүп сайзыраарынга таарымчалыг байдалды тургузуп берген.
Р. ДЕМЧИК.
"Шын" №43 2023 чылдың июнь 14