Тере-Хөл кожууннуң Кунгуртуг суурнуң ниити ортумак өөредилге черинде патриотчу кижизидилге ажылы кончуг эки чоруп турар. Ол бүгүнү Онза байдалдар яамызының болгаш чалыы армейжилерниң 9-ку клазының өөреникчилери көргүскен.
9 “б” класстың удуртукчу башкызы Анжелика Манчын ОБЯ угланыышкынныг ажылдап турар. Ол башкылаашкын ажылында 27 чыл дургузунда ажылдап чоруур. Анжелика Ивановна өөреникчилерниң кижизидилге-даа, бодунуң эртеминиң-даа талазы-биле арга-дуржулгазы улуг. Ооң арга-дуржулгазының херечизи – амгы удуртуп турары 9-ку классчыларының Россия-даа, республика-даа, кожуун-даа чергелиг мөөрейлерге, олимпиадаларга болгаш оон-даа өске янзы-бүрү хемчеглерге идепкейлиг киржип, шаңналдыг черлерни доктаамал ап турары.
ОБЯ болгаш чалыы армейжилер клазы кайызы-даа бот-боттарынга дузалажып, демнежип чоруур болганындан школаның кандыг-даа культурлуг, патриотчу хемчеглерин эрттирип, кижизидилге талазы-биле директорнуң оралакчызының дузалакчылары болганнар.
Анжелика Манчынның клазында амгы үеде ниитизи-биле 20 өөреникчи өөренип турар. Оларның аразында 12 оол, 8 уруг бар. “ОБЯ класс болганывыста кандыг-даа патриотчу хемчеглерни, мөөрейлерни хилис эрттирбейн, шуптузунга кызып белеткенгеш, киржип, ат-сывывысты сыкпайн чоруур бис. Кандыг-даа мөөрейге уруглар, оолдар идепкейлии-биле киржип, харын-даа мурнун былаажып киржирлер. Чамдык боду дээш киржир мөөрейлерге ээлчежип алгаш, оочур ёзугаар-даа киржип турар бис. Мындыг идепкейжи, эрес-кежээ өөреникчилерлиг болганымга чоргаарланмас аргам чок” – деп, Анжелика Манчын чугаалаан.
Олар чүгле кижизидилге талазынга эвес, а өөредилге талазынга база чыда калбайн чоруурлар. Доозукчу класс күрүне шылгалдаларынга сентябрь айның эгезинден тура-ла шыңгыы белеткенип, тургускан чурум ёзугаар консультациялап эгелей берген.
Амгы үеде “Ойна” алдын тывыш артели элээди кунгуртугжуларга “Күш-ажылга мөгейиг” деп мөөрейни эгелей берген. Кунгуртуг суурда чааскаан арткан болгаш улуг назылыг кижилерге боттарының дузазын кадып, мөөрейге тиилээри-биле идепкейлиг киржип турарлар. “Бо эрттирип турар мөөрейни кончуг эки деп санаар-дыр мен. Күш-ажылга кижизидилге талазы-биле хемчеглер көңгүс ховартаан үеде мындыг мөөрейни эрттирип турары кончуг чугула. Суурувуста улуг назылыг кижилеривиске барып дузалажырывыска, аажок өөрүүрлер. Аңаа баргаш, ыяжын чарып, суглап, чунар-бажыңын-даа одап берип, чурттап олурар оран-савазының болгаш хериминиң иштин аштап-арыглап, өөреникчилер боттарының шыдапкы дег бар-ла ажылдарын кылып, сеткилинден дузалажып турарлар” – деп, 9 “б” класстың удуртукчу башкызы мөөрейге өөреникчилериниң изиг күзелдии-биле идепкейлиг киржип турарын онзалап демдеглээн.
Ол ышкаш ОБЯ класс удавас найысылал Кызылга болуп эртер республика чергелиг мөөрейге киржири-биле база белеткенип эгелей берген.
Чыжыргана СААЯ.
«Шын» №75 2023 чылдың октябрь 4