Ыраккы Тожу кожууннуң 250 чурттакчылыг Ырбан суурда чаа фельдшер-акушер пунктузу ажыттынган. Эрткен чылын кадык камгалал адырында чаа туттунган оран-саваларның сөөлгүзү деп болур. 2024 чылда республикада ниитизи-биле 12 фельдшер-акушер пунктулары болгаш эмчи амбулаториялары туттунган. Кадык камгалал сайыдының бирги оралакчызы Марианна Куулар чаа ФАП-тың ажыглалче киргени-биле ырбанчыларга байырын чедирген.
Ырбан бир шагда хөй чурттакчылыг, ыяш белеткээр бүдүрүлгелиг суур турган. Амгы үеде ооң чурттакчы чонунуң саны элээн кызырлырга, участок эмнелгези, эмчи лабораториязы фельдшер-акушер пунктузунче эде тургустунган. “Бир талазында, чаа оран-савада келгенивис өөрүнчүг-дүр. Ынчалза-даа эрги оран-сава делгем, чылыг”– деп, Тыва Республиканың алдарлыг эмчизи болгаш Россияның кадык камгалалының тергиини, солуттунмас эмчи Бронислав Болеславович Лашевич сагыш-сеткили-биле үлешкен.
Ырбанның фельдшер-акушер пунктузунуң онзагай чүүлү ында 1970 чылдарда ыраккы Польшадан келген дээди эртемниг эмчи ажылдап турар. Ол бодунуң мергежилинге бердинип, Ырбан сумузунуң чурттакчы чонунга бараан болуп, бүзүрелдии-биле ажылдап чоруур. ФАП эмчи дузазы келгижеге чедир дузаны чедирип турар. Ынчангаш аңаа немей эмчи хереглеттинмес.
Бронислав Лашевич кады ажылдап турар коллективи-биле эмнелге албан чериниң совет үеде-ле турган дериг-херекселин амдыгаа чедир камныг эдилеп келген. Оларның чамдыызын чаа оран-саваже эккеп ап болур.
Эмчи бодунуң бедик мергежилдии болгаш кижилерге ынак, эки сеткилдии-биле чаңгыс чер чурттугларының хүндүткелин чаалап алган. Ол кайнаар-даа чоруур дивейн турар. Ооң бодап турары-биле алырга, чаа оран-савада чедир кылыр чүүлдер бар. Коллективи-биле ыяш одаар одалга системазын сайзырадыр болгаш ажылдаарынга эптиг черни организастап кылыр бодалдыг.
Ырбанчылар боттарының талазындан чаа эт-херекселди тургускан, ам-даа частынмаан дериг-херекселдиг, компьютерлиг амгы үениң негелделеринге дүгжүп турар чаа ФАП-ты магадап, федералдыг национал төлевилел-биле оларның ыраккы суурунга эмнелге оран-савазын тудуп бергенинге өөрүп четтиргенин илереткеннер.
Чыжыргана СААЯ белеткээн.
Чуруктарны интернет четкизинден алган.
“Шын” №2 2025 чылдың январь 23
Ыраккы Ырбан суурда...
25 января 2025
8