Совет үениң тыва чогаалчыларының чогаадыкчы ажылының бир онзагай талазы – оларның бижээн шүлүктери ырылар апарып, бо хүннерге чедир уттундурбааны. Улуг назы-харлыг болгаш аныяк ыраажылар амгы үеде ырлажып турар. Ол ырларның сөзүн, аялгазын кайы шүлүкчү, кайы композитор бижээнин ыраажылар болгаш дыңнакчылар билбес болгулаар. Хөй шүлүктери ырылар апарган чогаалчыларның бирээзи Олег Сувакпит. Ооң ырылар апарган шүлүктерин номчукчуга бараалгаттывыс.
Олег СУВАКПИТ, ССРЭ-ниң чогаалчылар эвилелиниң кежигүнү.
ЧҮГЛЕ СЕҢЭЭ
Чечек бажы, хүн чок болза,
Четчип үнүп келир эвес.
Сеткил-чүрээм, сен чок болза,
Сергеп ойнап келир эвес.
Хүннүң шонуу изиг болгаш,
Хүрең-кызыл шырайлыг мен.
Күжүрүм сээ ынак болгаш,
Күзелимден хандыккан мен.
Амыдырал – чолум болгаш,
Ажыл-ишчи бүдүштүг мен.
Амырагым – чүрээм болгаш,
Арыг-шынчы бердинген мен.
СЫЛДЫСТЫГДА
Ажылымны төндүргеш,
Амырактың болчаанче
Ынакшылым хайныгып,
Ырлай аарак базыптым.
Эштиң сөзүн дыңнаксааш,
Эргилдир бодап чор мен.
Орай дүннүң шолбаны
Орук уткуй чырыды.
Дамырак суг шылырап,
“Далаш” дээн дег чайнай-дыр.
Күжүрүмнү көөрүмге,
Хүлүмзүрүп, бо кел чор.
Арнывысче көрүшкеш,
Аңгадай-ла бердивис.
Чүрек долган ынакшыл
Чүүден артык кыптыкты.
Кандыг сөстү сөглээрин
Кайывыс-даа тыппады.
Кылаңнашкан сылдыстар
Кырывыстан көрзе-даа.
Частып үнген чечектер
Чанывыска турза-даа.
Оларны бис уттупкаш,
Ошкажыпкан болдувус.
«Шын» №36 2024 чылдың май 18