Хоорайларда болгаш суурларда тояап чоруп турар ээлери чок-даа, ээлерлиг-даа ыттар чурттакчы чонга айыылдыг апарганын чоокта чаа Кызыл хоорайда черлик ыттар аразындан калчаа аарыг ыттың тывылганы, улуг кижилерни-даа, бичии уругларны-даа ыттар ызырып каан таварылгалар көвүдээни херечилеп турар.
2024 чылдың июнь айда Барыын-Хемчик кожууннуң Хөнделең суурга 13 харлыг уругну “Алабай” уксааның улуг-шыырак ыды ызырган. Ытка ызырткан уругга эмчи дузазын дүрген чедирген.
“Алабай” ыт ол суурнуң чурттакчыларының бирээзиниң ыды болган. Барыын-Хемчик кожууннуң прокуратуразы бо таварылгага хамаарыштыр хыналданы чоруткаш, уругнуң мага-бодун ыт балыгландыр ызырганын, бичии кижиге угаан-сегээн когаралын чедиргенин бадыткаан. Истелге херээн прокуратура органы Барыын-Хемчик кожууннуң судунче дамчыткан. Суд кожууннуң прокуратуразының кеземче херээн деткип, “Алабай” уксаалыг ыттың ээзи Хөнделең суурнуң чурттакчызын 50 муң рубльга торгаан. Ол торгаал акша-биле ытка ызырткан уругнуң материалдыг болгаш моральдыг когаралын дуглаар.
Ыттарга ызырткан хамаатылар оларның ээлеринден материалдыг болгаш моральдыг когаралды акша-биле дугладып ап турар таварылгалар сөөлгү үеде Россияның регионнарының суурларында көвүдээн. Бо чүүл тояанчы ыттарны эвээжедир ажылга, ээлери ыттарын багга тударынга салдарлыг болуп турар.
С.А. ООРЖАК,
ТР-ниң прокурорунуң улуг дузалакчызы.
“Шын” №86 2024 чылдың ноябрь 9