Бистиң чоок киживис Николай Байырович АРАКЧААНЫҢ 75 харлаан юбилейи-биле сеткиливис ханызындан байыр чедирип тур бис. Эргим ынак киживиске юбилейи таварыштыр каң дег быжыг кадыкшылды, узун назынны, өг-бүлезинге аас-кежикти күзевишаан, аравыска ам-даа хөй чылдар иштинде бисти өөртүп чоруурун йөрээр-дир бис.
Уруглары, уйнуктары болгаш хөй санныг дөргүл-төрели
КУРАНГА ЧАЛБАРЫГ
Олут орбас орлан акым,
Чыдын чытпас кежээ акым.
Оран-таңды эргий кезиир
Ортун акым чалбарыы-дыр:
«Куран» дээрге элик чурту
Бурунгу түрк дылда ындыг.
Куран хонаш турар черде
Кулан, элик маңнап турар.
Староверлер тургускан дээр,
Карак часпаан кежиктиг чер.
Салдыгбайлар көжүп келгеш,
Кайыын чазар, байлаан тыпкан.
Ужур-чөвүн коптарарга,
Угу-дөзү – Чооду чайлаа.
Түмен-Байыр өгбе бистиң
Түмен чылгы чыглыр чери.
Ынчангаштың ындыг боор мен,
Ыдык ыяш – Чаңгыс-Дытка чүдүп чор мен.
Ыракшылдыг бодаар болза,
Ындыг оран ховар-ла боор.
Аңнаар, дииңнээр, балык тудар,
Тооруктаар, каттаар, бестээр.
Аңчы кижи ээлеп чурттаар,
Тодуг-догаа тайгаларлыг.
Хадымырлаан Куран онза
Хады-Сээрбек кыйгырганзыг.
Кадыыр туткаш, сиген кезип,
Хараттынып таалап чоруур.
Таңды-Уула кайы сен деп,
Тайга-Сынче бедип үнгеш,
Талыгырже харап көөрге,
Таан-даа чараш, сеткил таалаар!
Тайга черниң агаарының эмзиг домнуу
Төтпес, ханмас, айдыс чыттыг, магалыг-дыр!
Терең хемниң эзининиң кылаңнаажы
Төнмес-батпас чылчырыктаар кайгамчыктыг-дыр!
Таңды-Уула аар ийи, бээр ийи
Таан делгем девискээрлер.
Калдак-Хамар, Чаа-Оваа шөл,
Шокар-Оймак – шупту Тестиң.
Самагалдай төк дээн черим
Сарыг чечээн чадып алган.
Саглаңайнып мени кый деп,
Сагындым деп манап чыдар.
Дедир-Хая озалааш чер,
Дендии маажым удуп чыдар…
Ада-ием Дээрни шуглааш,
«Алдын» черниң чамашкызы болу берген…
«Алдын» хүннүң адаан орта
Ам-даа пөкпейн, чурттаксаар мен.
Ачазының хыралбас каң күчү-күжүн
Ажы-төлге, ачыларга дамчыдар мен.
Куран өдээн кевирбээли,
Деңгер-Дээрлер камгалазын!
Кезээ шагда бойдус арыг
Кежиин-байлаан сунуп чорзун!
Курай-курай, Курай-курай!
Кужурсураан Куранымны!
Өршээ Бурган, кудум-сүзүүм,
Куранымны алгап чорууйн!
Зоя АРАКЧАА.
"Шын" №40 2023 чылдың июнь 3