Ада-чурт камгалакчызының хүнүн таварыштыр Арысканга эр улус аразынга ажыктыг, солун, боттарының күжүн шенежир “Ыяш чарар” деп мөөрейни эрттирген. Көдээ черде эр чоннуң үргүлчү кылып чоруур ажылы, оолдарын чажындан тура эдертип алгаш, ыяш ажылынга өөредип-кижизидип турар хүн бүрүнүң ажылы. Арыг ыяш-биле суугу одап турар болгаш көдээ суурнуң хары безин карак чылчырыктаар, кылаңайнып чыдар.
Мөөрей күш-дамыр эргилдезинге, мага-ботту дадыктырарынга, бичии изиргенип алырынга база таарымчалыг. Ажыл-ишке дадыкканы – балдыны эптиг туткаш, шынарлыг шевергин чарары көстүп кээр. Балды даажы, чарган ыяштың шаккылааны, изиг-изиг маргылдаа чоруп турарын эрткен кижилер сонуургап, киржикчилерниң хөөнүн көдүрүп турган.
Солун мөөрейге адааннажып, 13 эр киришкен. Мөөрейниң негелдези — 15 токпак ыяшты кым кайы хире үе ишти чарыптары.
Кашпагай оолдар чаңгыс минута дургузунда-ла бир тележка хире ыяшты чарып каапкан. Түңнелинде Артем Байыр 1 минута 09 секунда ишти ыяшты чаргаш, 1-ги черге төлептиг болган. Дараазында 2-ги черни Алик Серендук, 3-күзүн Саян Савый, 4-кү черни Азият Мунзук, 5-ки черни Белек Байыр, 6-7-ги черлерни Мөңгүн-оол Мунзук биле Назын-оол Шивит-оол алганнар.
Эң улуг назылыг киржикчилер Начын-оол Шивит-оол, Орлан Сат акыларывыс болганнар.
Деткикчилер: Сай-Суу Даваакай, Алдынай Чүльдүм, Константин Тас-оол, Радик Сарыг-оол, Чечек Сырбыкай, Роляна Конгар.
Деткикчилеривис болгаш идепкейлиг киришкен эр чонувуска улуу-биле өөрүп четтиргенивис илереттивис.
/ «Улуг-Хем» солуннуң медээзинден.
“Шын” №7 2026 чылдың февраль 26