Тываның талантылыг журнализи, юморист чогаалчызы Вячеслав Тимофеев 1940 чылдың ноябрь 7-де төрүттүнген. “Тувинская правда” солуннуң корреспондентизи, кол редактору чораан. Тываның орус чогаалчыларының аразындан Вячеслав Яковлевич — юмор жанрынга ажылдап чораан чаңгыс чогаалчы. Тыва литературага балаттынмас изин ол арттырган. Хөглүг-баштак чечен чугааларлыг “Девятый сон Цыряпкина”, “Пешком до моря Лаптевых” дээш өске-даа номнары номчукчуларның сонуургалын чаалап алган.
Вячеслав Тимофеевтиң хөглүг-баштак шоодуглуг чечен чугааларын ооң өңнүү, чогаалчы, журналист Даңгыт Чыдым тыва дылче очулдурган. Номчукчунуң кичээнгейин “Чаа Чыл дүнезинде” деп чечен чугааны бараалгаттывыс.
Шынга дүүшпес чарлалдар
Бир-ле катап Никоноров солун садып алыр дээш, солун садар үгекке келирге, ол хааглыг болган. «Бааза чоруй бардым, удавас кээр мен» дээн сөстер бижээн саазын азып каан болган.
Он минута манаан, чок, чээрби четкен, сураг, бир шак олуруп келген — үгек эргелекчизи келбээн. Мындыг ужур-дүрүм чок чүвени анаа эрттирип болбас. Ол баазаның кайда турарын билип алгаш, Никоноров олче чорупкан. «Складта мен. Бараан хүлээп ап тур мен» деп сөстер бижээн чарлалды ооң эжиинден номчаан. Өске кижи болза ону номчааш, чана-ла бээр турду ыйнаан, а Никоноров ындыг эвес кижи-ле болгай: сегирип алган ажылын эчизинге чедирер.
Контораже маңнапкан. А ында чүгле таңныыл хүнде дөгеленип орган.
— Хамык ажылдакчыларыңар кайдал? — деп, Никоноров оон айтырган.
— Лекция болуп турар — деп эзевишаан, таңныыл харыылаан.
Халас үе чидирбес дээш, столоваяже чорупкан. А ында база-ла чарлал бар: «Ажылдавас. Суг чок». «Халап чүве-дир аа — деп, Никоноров чугааланган.— Ынчалза-даа дүжүп бербес мен, ыявыла шынын тывар мен».
Ол хоорайга ижер суг бээр албан черинче чорупкан.
Станцияга бир кижи Никоноровче үнүп келгеш:
— Мындыг чүве-дир ийин — деп, станция кижизи тайылбырлаан. — Бичии үрелиишкин болу берди ышкажыл. А дежурный механик, өштүг чүве-биле дөмей, эмчиже чорупту. Караанче бир-ле чүве кире берген.
Эмнелгеге канчаар чедерин ол кижиден айтырып алган. Поликлиникага Никоноров кирип келген. Топтап көргеш, Никоноров бодунуң кабинедин танып каан.
Ол улуг тынгаш, ак халадын кеткеш, эжикте азып кааны «Санитар шагы» дээн таблицаны дужүргеш, аарыг кижилерни хүлээп ап эгелей берген...
Чурукту интернеттен хоолгалаан.
“Шын” №42 2025 чылдың октябрь 30