Рубрикалар

НААДЫМ-2021 СЕНТЯБРЬ 24-ТЕ БОЛУР

Сентябрь 24-те малчыннарның Наадым байырлалын Covid-19 хамчыынга удур санитар-эпидемиологтуг хемчеглерни сагып тургаш эрттирер. Ол дугайында 487 дугаарлыг доктаалды Тываның чазаа сентябрь 15-те хүлээп алган. Ында бижип турары болза, коронавирус хамчыын нептеретпези-биле Наадымда малчыннарны хүндүлеп байырлаар езулалды санитар-эпидемиологтуг хемчеглерни сагып тургаш эрттирер. Август айда байырлалды эпидемиологтуг байдал баксырап эгелээрге чылдырган турган.

Наадымның байырлыг хемчеглерин чаңчыл езугаар ТР-ниң Көдээ ажыл-агый болгаш аъш-чем, Культура база Спорт яамылары организастаар. 2021 чылдың сентябрь 24-те байырлал хемчеглерин эрттирер черлерге, орук-транспорт болгаш хөй-ниитиниң чурумун хайгаараарын хандырар талазы-биле күштелдирерин Иштики херектер яамызының Тыва Республика талазы-биле эргелелинге дааскан.

Наадым ажыл хүнү — пятницада таваржы берген болганда, «Тыва Республиканың байырлал хүннери дугайында» 143 дугаарлыг доктаалы езугаар ол хүннү дыштаныр байырлал хүнү кылдыр санаар.

Малчыннар байырлалы Наадым-2021-ге тураскааткан хемчеглерниң программазы:
10.00 шакта — «Хүреш» стадионга Наадым-2021 чемпионнарын шаңнаар байырлыг езулал. Көрүкчүлерниң саны кызыгаарлыг.
11.00 шакта — Эрзин кожууннуң Божалыг деп черге республика чергелиг аът чарыжы.
12.00 шакта — «Хүреш» стадионга үндезин тыва баг адар маргылдаа. Көрүкчүлерниң саны кызыгаарлыг.
13.00 шак – 128 мөге аразынга Наадым хүрежиниң дорт дамчыдылгазы. Маргылдаа «Сүбедей» спорт комплекизинге хааглыг хевирге эртер.

#Наадым_2021 #Байырлал #Хүреш #Тыва #Тува #Шынсолун #Тывадыл #Тывамедээ #Tuva #Shyntuva

Предыдущая запись
ХАЙГААРАКЧЫ-БЛОГЕР СОЛАҢГЫ КЫРГЫС
Следующая запись
АЛЕКСАНДР БОЛГАШ «СУРАГЛЫГ» МИКРОФОН
Меню