Чөөн-Хемчик кожууннуӊ Бажыӊ-Алаак суурда бичии уруглар библиотеказынга чогаалчы Саая Таспайныӊ адын тывыскан.
Бичии уругларга шүлүктер болгаш чечен чугаалар чогаадырынга онзагай салым чаяан херек дээрзин хоочун чогаалчылар-даа, чогаал эртемденнери-даа айтып турар. Тыва уруглар чогаалыныӊ үндезилекчилериниӊ бирээзи Олег Өдербеевич Сувакпиттиӊ кады төрээн оол дуӊмазы Саая Өдербеевич Таспай база ындыг онзагай уран-талантылыг болган. Ол он тос харлыында, баштайгы чечен чугаазын «Сылдычыгаш» солунга парлаткан. Баштайгы ному «Чаа-Суур» 1968 чылда, оон «Чаптанчыг амытаннар» (1974), «Частың белээ» (1980) деп номнары чырыкче үнген. Ооң шүлүктеринге он ажыг ырылар чогааттынган.
Саая Өдербеевич Таспай – шүлүкчү, журналист, культура ажылдакчызы, «Тос-Дээр» хамнар ниитилелиниӊ кежигүнү. Күш-ажылчы оруун «Искра» колхозка эгелээн. Кызылдыӊ кооператив училищезинге повар-кулинар деп мергежилди өөренип алган. А ол мергежили-биле Чаа-Хөл суурга поварлап ажылдап турган. Ооӊ соонда Үрбүн, Бажыӊ-Алаак, Чаа-Хөл, Хандагайты, Суг-Аксы суурларныӊ культура бажыӊынга директорлап турган. Чогаалчы бодунуӊ амыдыралчы туружун шүлүүнге илереткен:
«Кандыг-даа иш тутканымда,
Харыксырап могавас мен.
Шыӊганнарым улам дыӊзып чарталы бээр
Шыдал күжүм хей-аът кирип кыптыгып кээр.
Ынчангаштыӊ ажыл-ишке
Ынак болган ужурум ол
Ажыл чокта, чаӊгыс шак-даа олуртунмас
Амыдырап-чурттап черле шыдавас мен».
Кандыг-даа ажыл кылырындан ойталавас, бөдүүн, ажылгыр кежээ шүлүкчү Саая Таспайны, ССРЭ-ге В.И.Ленинниӊ төрүттүнгенинден бээр 100 харлаанын демдеглеп турда, «Күш-ажылчы шылгарал дээш» деп медаль-биле шаӊнаан.
Шүлүкчүнүӊ өскен-төрээн Бажыӊ-Алаак суурунга Саая Таспайныӊ дугайында төөгүнү кадаглап арттырары-биле, уруглар библиотеказынга ооӊ ады-биле адаарын ооӊ уйнуу Сырга Сувакпут саналдаан.
Бажыӊ-Алаакс суурда уруглар библиотеказынга сураглыг шүлүкчүнүӊ адын тывыскан байырлалга «Тыва медиа бөлүк» киришкен. Олар «Сылдысчыгаш», «Тываныӊ аныяктары» солуннарныӊ өнгүр чараш үндүрүлгелерин белек кылдыр сөӊнээн.
Р.Демчик белеткээн