“Информациялыг инфратургузуг” федералдыг төлевилелдиң чорудуу-биле Бии-Хем кожууннуң школаларынга болгаш фельдшер-акушер пунктуларынга (ФАП) дүрген ажылдаар интернет четкизин кошкан.
“Информациялыг инфратургузуг” федералдыг төлевилелдиң "Чурагайлыг экономика" национал төлевилелин боттандырары-биле Бии-Хем кожууннуң Шивилиг ортумак школазынга харылзааның оптиктиг удазынын шөер ажылдарны чоруткан. Ам көдээ школа дүрген ажылдаар интернетче кирер аргалыг болган.
“2021 чылдың июль 13-те информатика кабинединге интернет шугумун салыр ажылдарны кылган. ТР-ниң Информатизация болгаш харылзаа яамызының, “Тывахарылзааинформнуң” удуртукчуларынга болгаш специалистеринге чогуур өйүнде кылып чоруттунган ажылы дээш четтиргенивисти илередир-дир бис” – Шивилиг ортумак школазының администрациязы социал четкиге бижээн.
2019 чылдан 2021 чылдың июль 15-ке чедир Бии-Хем кожууннуң 9 социал объектилерин интернет-биле хандырган: Туран хоорайның чагыргазын база ийи школазын, Сесерлиг сумунуң ФАП, чагыргазын база школазын, Шивилиг биле Хүт сумуларның ФАП-рын болгаш школаларын.
2021 чылдың төнчүзүнге чедир дүрген ажылдаар интернетке Бии-Хемниң ам-даа 16 социал объектилери коштунар: Туран хоорайда ийи ном саңынга, Аржаан, Уюк, Хадың база Суш сумуларның школаларынга, чагыргалары база ФАП-ры, ол ышкаш Тарлаг биле Билелиг сумуларның ФАП-га.
“Чурагайлыг экономика” национал төлевилелдиң кол күүседикчизи Тываның Информатизация болгаш харылзаа яамызы дээрзин сагындыраал.
#Чурагайлыгэкономика #Националтөлевилел #ТСИ #Тыва #Тува #Тувамедиагрупп #Тывадыл #Тывамедээ #Tuva #Shyntuva