Республиканың ийи муң ажыг өөреникчизи химия эртеминде угаан-билиг демиселинде киржип турар. Чыл санында бердинген айтырыглар нарыыдап турар. Ынчалза-даа өөреникчилерниң билии бедип, бердинген айтырыгларга харыылап турары эки. Бо удаада Тываның күрүне университединиң баазазынга ажылдарны бижээн.
Чыл санында болур олимпиадага эң-не шыырак уруглар киржип турар. Айтырыгны алган соонда, анаа-ла харыылай бербес, а хандыр боданып билири чугула. Бо удаада уруглар билдинмес бүдүмелдиң хемчээлин тывар ужурлуг.
– Эмчи болур күзелдиг мен. Ынчангаш күрүне шылгалдаларында химия эртемин шилип алган мен. Ооң мурнунда чүгле кожуун чергелиг олимпиадаларга киржип турган мен. Бо удаада регионалдыг олимпиадада киржип чедип келдим. Кожуунга киришкенинге көөрде, республика чергелии арай нарын-дыр деп көрүп тур мен. Ынчалза-даа теория кырында бижиири-даа, практиктиг кезээ-даа, ылаңгыя эмчи мергежилин шилип алганнарга солун болгаш ажыктыг-дыр — деп, Бии-Хем кожууннуң төлээзи Хорагай Тюлюш бодалын илеретти.
Тываның күрүне университеди чыл санында лабораторлуг класстарны уругларга белеткеп берип турар. Бо чылын 90 уруг билиин хынаан. Эпид байдалдың нарыыдааны-биле киржикчилерниң чамдыызы боттарының школаларында олимпиадада киржип турар. Химия эртеминге олимпиаданың регионалдыг чадазынга республиканың ийи муң ажыг уруглары киржип турар. Тиилекчилер Москва хоорайга болур Бүгү-российжи угаан-билиг демиселинге киржир эргени чаалап алыр.
Айдың ОНДАР.