Өгбелеривистиң бурунгу байырлалы чаа чылды уткаан Шагааны Дус-Даг сумузунда Торгалыгның малчыннары Чозаның Согуна-Даа, Хадыыр-Тайга эдээнде Чирик деп черинге демдеглеп эрттиргеннер. Аалдың ээзи Артыш Натпит-оол "Торгалыг" совхозка ажылдап чораан кырган ада-иезиниң кыштаанда мал-маганын кадарып турар аныяк малчын.
«Торгалыг» КУБ-туң удуртукчузу Алексей Донгак ажылдакчылары-биле малчыннарын хүндүлеп, чолукшуп, оюн-тоглааны эрттиргени солун болган. Чайның изии, кыштың соогу дивес кара даң бажындан орай кежээге чедир мал азырап чоруур малчыннарга Өвүр кожууннуң чагырга даргазы Аржаан Ооржак удуртукчулар-биле кады белек-селектерни сөңнеп четкен.
Аалга Шагаалап келген улуг назылыглар Зоя Натпит-оол, Татьяна Монгуш, Уран Куулар бүгү назынында мал соондан кылаштап, онча-менди азырап, шаандакы болгаш амгы үени деңнеп чугаалажып, аныяктарга арга-сүмени бергеннер. Ак-Кара-Суг, Чоза, Кара-Даг, Ховужук, Улуг-Кадыгбайдан келген малчыннар ойнап-хөглеп хүнзээн. Улуглары аът эзертеп, хендирбе сый шаап, тывызыктажып, чинчи чажыржып ойнаан, а чаштары дагдан чуңгулааннар.
Малчыннарны деткип, Дус-Даг сумузунуң удуртулгазы, Культура бажыңының артистери ыры-шоорун бараалгаткан, база библиотека ажылдакчызы номнар, солун-сеткүүлдү малчыннарга сонуургадып делгээн. Оон ыңай, эмчилер көдээ ишчилерниң кадыкшылын хынап, арга-сүмезин берип, эм-дом-биле дузазын катканнар. Шагаа байырлалын эки уткуп, ойнап-хөглээни солун болган.
Бистиң корр. #Шын