Дээди Хуралга ««Амгы үе» телеканалдың хоойлуга удур шимчээшкининге соңгукчуларның кыйгырыы» деп темага төгерик стол болуп эрткен. Бо хуралга Дээди Хуралдың депутаттары, Иштики херектер яамызының ажылдакчылары, «Шанхай» микрорайоннуң чурттакчылары дээш оон-даа өскелер олурушкан.
Кызыл хоорайның «Шанхай» микрорайонунуң чурттакчыларындан хомудал билдириишкин Дээди Хуралдың Даргазынга кирген турган. 2020 чылдың август айда билдинмес телеканалдың тырттырар бөлүү-биле кады «8 дугаар» каналдың журнализи Альмира Сенди микрорайоннуң чурттакчыларынга келгеш, аварийлиг бажыңнардан көжүрерин дүргедедиринге дузалажырын аазааш, сюжет тырттырарын чугаалаан. Амгы үеде Россия Федерациязының Санк-Петербургтан келген «Амгы үе» телеканалы даштыкы агентилерге хамааржыр дээрзи билдинген. Олар чурттакчыларга дуза кадарын аазааш, ол микрорайонда арагачы, наркоман, чедимче чок өг-бүлелер чурттап турар дээрзин дамчыткан. А херек кырында ол ындыг коргунчуг девискээр эвес, ында ажы-агыйжы, хөй ажы-төлдүг өг-бүлелер шаандан тура эп-найыралын салбайн, бот-боттарынга дузалажып чурттап чоруурлар.
Төгерик столдуң түңнелинде, аварийлиг бажыңнарның чурттакчылары кайнаар көжерин билген турары-биле ажылды күштелдирип, баннерге допчулай бижиирин сагындырган. Эң-не кол чүүл чурттакчы чонну өскээртен келген билдинмес журналистерге бүзүревезин, оларга интервью бербезин кыйгырган. А билдириишкин киирген чурттакчыларга Дээди Хуралдың депутаттары бо айтырыгны эчизинге чедир шиитпирлээринге арга-сүмени кадып, дузалажып турарлар.
Чыжыргана Саая.