ТР-ниң Кадык камгалал сайыды Анатолий Югай дорт кылып турар албан-хүлээлгезинден аңгыда, Бии-Хем кожууннуң куратору болуп турар. Эрткен дыштаныр хүннерде ол харыылап турар кожуунунуң Хүт суурунга четкеш, ында ажылдап турар фельдшер эмчиниң ажыл-агыйын болгаш ниити суурнуң чурттакчыларының кадыының байдалын сонуургап көрген.
Хүт суурда 234 кижи чурттап турар, ооң иштинде 93 уруглар. Наталья Михайловна Тову ында үр чылдарда ак сеткилдиг ажылдап турар. Дуржулгалыг эмчи суурунуң чурттакчы бүрүзүнүң кадыының байдалын кончуг эки билир дээрзин эскергенин сайыт социал четкиге бижээш, ажылынга бердинген эмчиге эки ажылы дээш өөрүп четтиргенин илереткен. 2023 чылда көдээни сайзырадыр программа таварыштыр бо суурга ФАП тудуун киирер айтырыгны камгалаар дээнин база бижээн.
Ол ажылчы сургакчылаашкынының үезинде Бии-Хем кожууннуң чагырыкчызы Күдер Монгуш болгаш ук кожууннуң төп эмнелгезиниң улуг эмчизи Адыгжы Куулар-биле эртип турар чылдың эки түңнелдерин кылбышаан, кожууннуң нарын айтырыгларын шиитпирлээри-биле келир чылда кылып чорудар план-сорулгаларны сайгарып чугаалашкан. Ажылдаар бис деп, ол бижээн.
К. МОНГУШ белеткээн.
#Кадыккамгалалы #ФАП #Хүт #Тыва #Тува #Шынсолун #Тывадыл #Тывамедээ #Tuva #Shyntuva