Чөөн-Хемчик кожууннуң төвү Чадаананың харылзаа оран-савазында чараштаныр болгаш дааранылга черлери ажыттынган. Социал керээге үндезилээн күрүнениң социал деткимчезиниң ачызында Амалия Монгуш биле Сюзана Монгуш боттарының хууда ажыл-херээн ажыдып алганы ол.
Баш таарар болгаш чараштаныр черге чадаанажылар болгаш чоок-кавы сумуларның чону кээп,бажының дүгүн будудуп, таарып алыр аргалыг апарган. Оон аңгыда карак кирбиин өстүртүп, дыргактар хевирлеп кылып база турар. Амалия алган деткимчези-биле баш таарарынга чугула херек профессионал херекселдерни садып алган.
Эгелеп чоруур сайгарлыкчы чаңгыс чер-чурттуглары кыстарны эвилелдеп, кады ажылдап турар. Бодунуң херээн ажыдар бетинде аңаа дадагалзал турбаанын ол чугаалаады. Чүге дизе, баш таарыкчызы бодунуң ажылын дыка эки билир. Ол баш таарар талазы-биле мастер-класстарны эгелеп чоруур парикмахерлерге база эрттирип турар.
Амалия Монгуш баш таарар чер кожуун төвүнде болгаш хереглелдиг чон оон үзүлбес дээрзин демдегледи. Чоорту кирбик, эрин, карактарны үр үе дургузунда балалбас кылдыр будуурун база шенээр бодалдыг.
Дааранылга чериниң аныяк ээзи Сюзананың чагыглары база үзүлбес. Ол социал керээ дамчыштыр акша-хөреңгизин алган дораан дааранылга дериг-херекселдерин садып алган. Бүдүрүлгеге ажыглаар чугула даараныр машиналардан аңгыда, пөстүң кескен чериниң кыдыгларын даараар машина, бус-биле хеп базар херексел база бар.
Шевер кыс национал шинчи-биле даараан чүвүрлүг костюмну чагыдып алыкчызынга дамчыдып берди. Ол хеп солуй кедер черге чаа хевин кедип алгаш, көрүнчүк мурнунда аажок таарзынган тур. Костюмну даарааны дээш өртек-үнези база таарымчалыг деп хереглекчи онзалап демдегледи.
Национал аян-биле даараан ажылдап кедер эр, кыс костюмнар, платьелер, тоннар, чеңи-чоктарны Сюзана даарап турар. Ол ышкаш чурттакчы чон хевин септедир, эде даарадыр дээш хөй чагыгларны киирип турары – ооң хеп быжар столунда чыскаай салган хеп херечилеп турар.
Сюзана ательезин чоокта чаа ажыткан болгаш амдыызында чааскаан дааранып турарын чугаалады. Чоорту ажылчын олуттарны немей тургузуп, хоорайның шеверлерин ажылче хүлээп алыр күзелдиг.
Баш таарыкчызы болгаш даараныкчы – күш-ажыл рыногунда чугула херек мергежилдерниң санында. Аныяк сайгарлыкчылар күрүнеден алган деткимчени кызымаккай ажылы-биле бадыткаар сорулгалыг.
Күрүнеден социал дузаны тыпсыры-биле 2020 чылда 21 регионга күрүнеден социал дуза бээр шенелде төлевилелди эгелээн. Ол регионнарның санынче Тыва база кирген. Эрткен чылын дөрт муң хире социал керээлерни чарган, хөй-төлдүг алдан муң ажыг өг-бүлелер деткимчениң аңгы-аңгы хевирин алганнар.
Бо чылын “Социал керээ” программаның акшаландырыышкынын барык 40 хуу өстүрген. Социал керээниң акша-хөреңгизин хамаатылар хууда дузалал ажыл-агыйын хөгжүдеринге ажыглап болурунуң дугайында доктаалга Россия Федерациязының Чазааның Даргазы Михаил Мишустин 2021 чылдың январь 1-де холунуң үжүүн салганын сагындырып каалы.
Чуруктарны Буян Ооржак тырттырган
#Экономика #Социалкерээ #Сайгарлыкчычорук #Чөөн_хемчиккожуун #Чадаана #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews