– Спорттуң кышкы хевирлеринге хандыкшылдыгларның болгаш маргылдаага киржир күзелдиглерниң саны хөй болганындан организакчылар чагыгларны болгаш киржикчилерниң санын кызыгаарлаар ужурга таварышкан, Росхереглелхайгааралдың негелделери ындыг болган – деп, Россияның Пенсионерлер чөвүлелиниң Тывада регионалдыг салбырының даргазы Алла Хурума дыңнаткан.
Грантының кол сорулгазы – пенсионерлерниң ортузунга оларның чурттап турар чериниң аайы-биле спортчу кадыкшылга кичээлдерин үргүлчү эрттирери болур. Маргылдаажы сеткил-хөөн тиилелгелерже чүткүлдү оттуруп, боттуң чедер-четпестерин ажып эртеринге дузалаар. Маргылдааның киржикчилериниң дыка хөйүнге спорт-биле холбаа дээрге амыдыралдың кадык овур-хевириниң хүн бүрүнүң негелдези, узун назылаарының магадылалы болуп келир дээрзи өөрүнчүг.
“Мындыг чергелиг маргылдаалар эрттирериниң арга-дуржулгазы бисте бар. 2018 чылда Россияның Пенсия фондузунуң Кызылда салбыры «Кырган-ава, кырган-ача – Тывага спорт дээш” деп Президент грантызын, 2019 чылда Мөңгүн-Тайга кожуунда тус черниң салбыры ТР-ниң Күш-ажыл болгаш социал политика яамызының “Амыдыралдың кадык овур-хевири — узун назылаарының үндезини” деп грантызын боттандырган.
Ук үүле-херектерниң девии-биле республиканың чыынды командазы 2018 чылда Новосибирскиге, 2019 чылда Уфа (Өфө) хоорайга болуп эрткен пенсионерлер спартакиадаларынга киришкеш, багай эвес көргүзүглерлиг болган” — деп, Алла Хурума чугаалап турар.
Бо удаагы Спартакиадага спорттуң 5 хевиринге 14 команда күжүн шенешкен. Спортка хандыкшылдыгларның хөй нуруузу 60-69 хар үезинде, дөрттүң бирээзи-ле 70 хардан өрү назылыг, а үш киржикчи 80 хар ашкан назылыг.
Спортчу маргылдааларның эң улуг назылыг киржикчизи Таңды кожууннуң 82 харлыг чурттакчызы Александр Алексеевич Саликов шыдыраага 4-кү черни ээлээн. Кызыл хоорайдан кайызы-даа 81 харлыг ийи Галя – Галина Анандыевна Сагаачы биле Галина Александровна Хопрова скандинав кылашка киришкенннер.
Маргылдааларның түңнелинде хууда бирги чер дээш хаактыг чарышка эң эки көргүзүгнү Чөөн-Хемчиктен Сергей Ооржак, херээженнер ортузунга – Кызылдан Елена Оюн көргүскен.
Стол теннизинге кызылчы Валентина Дүктүг-оол херээженнер ортузунга тергиидээн, эр улус аразынга – ыраккы Мөңгүн-Тайгадан Сергей Намчыл, шыдыраага – Өвүрден Валерий Куулар болгаш Барыын-Хемчик кожуундан Виктория Ондар өскелерден артыкшылдыг күштүүн көргүскеннер.
Эштиринге бирги адаккы бөлүктүң эр улузунуң ортузунга Валерий Сарыглар (Ак-Довурак) тиилээн, II адаккы бөлүкке эр улузунуң ортузунга Денис Дажимба (Эрзин), херээженнер ортузунга Кызыл чурттуг Рита Ли шылгараан.
Спартакиада программазының хууда хевирлеринге бирден үшкү шаңналдыг черлерни ээлээн киржикчилерни Тыва Республиканың Спорт яамызының, Россияның Пенсионерлер чөвүлелиниң Тывада регионалдыг салбырының дипломнары-биле шаңнаан.
А. ХЕРТЕК белеткээн.