Пасха деп сөс "шилчий бээр" дээни ол. Христианнарга ол дээрге өлүмден чуртталгаже шилчиири дээни ол, чүге дизе бо хүнде Иисус Христостуң дирилгенин сактып турар.
2020 чыл бурунгаар кижилерниң камгалалы дээш мөңге Бурган кижи апарган. Бурган-кижи Иисус Христос чер кырынга 30 чыл чурттаан: Ол өлүглерни диргизип, согурланы көөр кылып, бодунуң Бурганныг өөредиин кижилерге суртаалдап турган. Ынчалза-даа ооң чер кырынга келгениниң кол сорулгазы – бүгү кижи төрелгенниң бачыттары дээш бодун өргүүрү. Христос эки тура-биле бодун крестиге өлүмче берипкен. Израиль чоннуң шажын баштыңчылары адааргааш, ону крестиге хере шапкан.
Христос крестиге өлген. Ооң-биле кады ийи дээрбечилер база хере шаптырган турган. Камгалакчының мөчүзүн куй иштинге хөөржүдүп каан. А сүлде-сагыжы-биле Дээрги Иисус Христос эрлик оранынче баткаш, аңаа турган, чаңгыс алыс шын Бурганга бүзүреп чорааннарны хостап алган (шупту өлгеннер эрлик оранынга турган).
Үш дугаар хүнде, улуг-хүннүң даң бажында, Христостуң өөреникчилери ооң орнукшуттунган куюнга чедип келген.
Куйнуң аксынга оларны Бурганның Элчини (Ангел) уткуп алгаш, Иисустуң дирлип келгенин медээлээн. Ол-ла хүннүң кежээзинде Христос бодунуң өөреникчилерниге дирилген мөчүлүг боттанып көстүп келген. 40 хонуктуң дургузунда Иисус Христос бодунуң өөреникчилеринге 10 катап келген. 40 дугаар хонуунда ол бодунуң мөчүзү-биле дээрже көдүрлүп үнген (Дээрлиг дүжүлгезинче).
Оон 10 хонганда Дээрги черже Ыдыктыг Сүлдени чоргузупкан, Бурганның өг-бүлезинде бүгү язы-сөөк болгаш назы-харны хараа тудуп турар Православ Церковьту тургускан.
Христостуң дирилгениниң өөрүнчүг медээзин ооң өөреникчилери – апостолдар бүгү делегейге тарадып чорупкан. Ынчангаш бо хүн өөрүнчүг Пасха кижи бүрүзүнге хамааржыр, чүге дээрге Христос чер кырынга чурттап чораан бүгү кижилерни диргизиптерин аазаан. Кажан Дээрги чер кырынга ийи дугаар келирге, бо бүгү боттаныр.
Христос дирлип келген! Шынап-ла дирлип келген!
Антоний Дулевич, Кызылда епархияның миссионерлер салбырының удуртукчузу.#Шын