Тываның көдээ ажыл-агый талазы-биле эртем ажылдакчылары Соңгукчу Монгуштуң удуртулгазы-биле Шемиге чорааннар.
ТР-ниң Көдээ ажыл-агый яамызы бода болгаш шээр малдың уксаазын экижидер талазы-биле комплекстиг хемчеглерни чорудуп турар.
2019 чылда "Агростартап" шугуму-биле Россияның аңгы-аңгы регионнарындан бүдүрүкчү кошкарлар эккээр талазы-биле төлевилелди боттандырганнар.
Эъткир уксаалыг шээр мал угланыышкыны-биле Калмык Республикадан кадыгзымаар дүктүг бүдүрүкчү кошкарларны эрткен чылын Чөөн-Хемчиктиң Шеми сумузунда Үстүү Хову-Аксы деп черде арат, фермер ажыл-агыйлыг Али Олегович Донгактың коданынга чедирип, хүлээдип берген.
Сентябрь 11-де, Тываның көдээ ажыл-агый институдунда эртем ажылдакчызы, Баян-Тала чурттуг хоочунувус Соңгукчу Сазыг-оолович удурткан эртем ажылдакчылары, көдээ ажыл-агый яамызының оралакчы сайыды Аян Монгуш, эртем ажылдакчызы Елена Макарова, яамыда уксаажыдылга ажылының талазы-биле эргелел начальниги Галина Ондар олар кошкарларның даштыкы байдалын көрүп, деңзилеп, тус черниң байдалынга таарышкан, таарышпаанын көрүп, зоотехниктиг негелделерге дүгжүп турар бе дээрзин хынап көргеннер. Бүдүрүкчү кошкарларны удавас Шеми девискээринде хойжу коданнарже салырын Чөөн-Хемчик кожууннуң көдээ ажыл-агый эргелели болгаш суму чагыргазы-биле дугуржуп, шенелделерни кылырын планнаан.
Вячеслав МОНГУШ,
"Чаа орук" солуннуң кол редактору.
ШЕМИНИҢ ҮСТҮҮ ХОВУ-АКСЫНДА — БҮДҮРҮКЧҮ КАЛМЫК КОШКАРЛАР
22 сентября 2020
33