Тываның Кадык камгалал яамызы уруглар ортузунда ОРВИ-ден аарыыр чоруктуң сезоннуг үези эгелээни-биле, уруглар эмчилериниң үнүүшкүннүг үш бригадазын алды чедир көвүдеткен. Оон аңгыда Кызыл хоорайның шупту уруглар поликлиникаларынга соңгаарладып болбас эмчи дузазын көргүзери-биле немелде кабинеттерни ажыдып, ооң ажылдаар шагын 8.00 шактан 22.00 шакка чедир кылдыр тургускан. Бир эвес уругнуң эъди изип, ОРВИ-ниң им-демдектери бар болза, хөй шугумнуг 6-14-24 дугаарже долгааш, эмчини бажыңче кыйгыртып болур.
Республиканың уруглар эмнелгезиниң үнүүшкүннүг бригадалары ийи ээлчегге ажылдаарын Кадык камгалал яамызы дыңнаткан. Хүннүң бирги чартыында - 8.00 шактан 15.00 шакка чедир үш бригада, а өске үжү 15.00 шактан 22.00 шакка чедир ажылдаар. 20.00 шакка чедир бажыңче кыйгыртылгаларны хүлээр. Бир эвес уругнуң байдалы бергедеп эгелээр болза, 103 дугаар-биле дүрген эмчи дузазын кыйгыртыр.
Тарылга — сезоннуг гриппке удур эң-не дээштиг арга ол дээрзин ведомство сагындырып турар. Республикада 57 720 санныг «Совигрипп» вакцина база 39 150 санныг «Ультрикс Квадри» вакцина келген. Гриппке удур тарыдарының национал календары езугаар, республикада 94 368 уруг тарыышкынны алыр ужурлуг. Сөөлгү дыңнадыг-биле алырга, 74 241 уруг тарыткан, азы планның 78,61 хузу.
Республикада ОРВИ-ден аарыыр чорук эпидемиологтуг чада четпээн, 10 муң чурттакчы чонга онааштыр 70,9, азы 2973 кижи. 14 хар четпээн, ОРВИ-ден аараан 103 уругну эрткен неделяда эмнелгелерде чыттырган.
#Тываныңчазааныңпарлалгаалбаны #ОРВИ #Кадыккамгалаляамызы #Тыва #Тува #Шынсолун #Тывадыл #Тывамедээ #Tuva #Shyntuva